Түркістан облысының адами әлеуетті дамыту басқармасы педагог мамандар үшін бос орындар конкурсын жариялайды. Бұл туралы бүгінгі брифингте Түркістан облысы адами әлеуетті дамыту басқарма басшысының орынбасары Ардақ Садықова мәлімдеді.
«Мұғалім тапшылығы бар өңірлердегі білім сапасын арттыру мақсатында Түркістан облысына білікті де ынталы мұғалімдерді, сондай-ақ еліміздің жоғары оқу орындарында педагогикалық мамандықтардың үздік түлектерін жұмысқа шақырамыз. Конкурсқа қатысу үшін үміткерлер тиісті құжаттарды жинақтап, компьютерлік тестілеуден өтеді. Құжаттар sanat.obl@mail.ru электронды поштасына 26 маусымға дейін қабылданады. Конкурстық іріктеуден өткен және арнайы бағдарламаға қатысушы оқытушыларға, жоғары оқу орындарының педагогикалық мамандықтарының түлектеріне – лауазымдық жалақысының 150% мөлшерінде есептелген қосымша төлемді қамтитын кешен ұсынылады. Конкурсқа қажетті толық ақпаратты +77076847100 нөміріне хабарласып білуге болады»- деді Ардақ Мәдіханқызы.
Сонымен қатар брифингке қатысқан Қ.А.Ясауи атындағы ХҚТУ ректоры Жанар Темірбекова мұндай бастамаларға қолдау көрсетуге әрдайым дайын екендіктерін әрі бұл конкурс түлектер үшін таптырмас мүмкіндік екенін айтты.
Мектеп бітірушілерін жұмысқа орналастыруға тоқталсақ, ұлттық бірыңғай тестілеу цифрлық форматқа өткізіліп, жылына 4 рет тапсыру мүмкіндігі берілді.Жалпы биылғы жылы 73 мың грантқа дейін бөліну жоспарланған, оның ішінде Техникалық мамандықтарға грант үлесі 40% пайыздан 60% пайызға дейін өсті. Биылғы 9-сынып бітірушілер саны 42 935 құрайды. Болжаммен биылғы жылы 9-сынып түлектерінің 75% – 10 сыныпта оқуларын жалғастырады, ал 25% кәсіптік және техникалық білім беретін оқу орындарына оқуға барады деп күтілуде. Өткен 2021 жылы 9-сынып түлектерінің 22% колледждерге түскен болатын.
Техникалық және кәсіптік білім беру ұйымдарында 42357 оқушы білім алуда. 2022 жылы 15252 түлек оқуды аяқтады. Биылғы жылы бітіруші түлектердің қорытынды емтихандарын WorldSkills бағалау жүйесі негізінде өткізетін мемлекеттік колледждердің үлесі 100 пайызға жетті.
Қазіргі таңда бітіруші түлектерді жұмысқа орналастыру бойынша әлеуметтік әріптестермен, кәсіпорындармен, тиісті мекемелермен бірлесіп ашық есік күндері, бос жұмыс орындары жәрмеңкелері ұйымдастырылып, өткізілуде.
2022 жылы техникалық және кәсіптік білім беретін оқу орындарына жергілікті бюджеттен 7000 грант бөліну қарастырылған (2021 жылы – 6047 орын). Қосымша республикалық бюджеттен 9-сынып бітірушілері үшін 10 000 грант бөліну жоспарлануда.
