2022 жыл – еліміз үшін мерейлі жыл. ҚР Рәміздерінің 30 жылдық мерекесі мен Ұлттық Қауіпсіздік Комитетінің құрылғанына 30 жыл толуына орай Төлеби ауданында мемлекеттік қызметкерлер арасында футболдан турнир өтті.
“Жастық” стадионында өткен спорттық жарыста Төлеби аудандық мәслихатының хатшысы Н.Қойбағаров Ұлттық қауіпсіздік комитеті қызметкерлерін кәсіби мерекесімен құттықтап, ізгі тілегін жеткізді.
– Бүгінде ұлттық қауіпсіздік орган қызметкерлері елімізді ұлттық қауіпсіздігін сенімді қамтамасыз етіп, мемлекетімізді сан түрлі террористік, экстремистік және өзге де заңсыз ұйымдар мен топтардың теріс пиғылынан қорғап келеді. Сіздер Отанымыздың тұтастығын қамтамасыз ете отыра, тәуелсіздігімізді нығайтып, халқымыздың тыныштығын сақтауда батырлықтың үлгісін көрсетіп отырсыздар. Батылдық, тапқырлық пен табандылықты бір арнаға тоғыстырып Отанымыздың қауіпсіздік стратегиясын іске асыру жолындағы жанқиярлық еңбектеріңіз табысты, азаматтық айбындарыңыз асқақ бола берсі, – деді Н. Қойбағаров.
Комитет қызметкерлері бөгде адамдар мен заттардың Қазақстан аумағына заңсыз енбеуін бақылап, өзге пиғылды адамдардың бейбіт күнге қол сұқпауын қадағалап қана қоймай, салауатты өмір салтын ұстанатындарын турнир барысында дәлелдей білді. Құқық қорғау органдары қызметкерлері спорттық ойында өздерінің мықтылығын мойындатты.
Тартысты өткен турнир қорытындысы бойынша 1-орынды ҚР ҰҚК Түркістан облысы бойынша департаментінің Төлеби аудандық бөлімшесінің командасы иеленді. Екінші жүлделі орыннан аудандық полиция бөлімі қызметкерлері көрінсе, 3-орын аудандық Сот және аудандық Прокуратура құрамасы жеңіп алды.
Турнир қорытындысы бойынша жеңімпаз атанған командалар марапатталып, кубок пен диплом, медаль табыс етілді.
