Созақ ауданы әкімі Мұхит Тұрысбеков халықпен кездесуде шағын елді мекендерге де барып, ауыл ақсалдарымен амандасып, халықпен жүздесуде. Жұмыс жоспарынан бөлек, Раң ата мен Шаға елді мекеніне ат басын бұрып тұрғындармен кездесті. Тұрғындар өз өтініштері мен сауалдарын аудан әкімі Мұхит Тұрысбековке қойып, толыққанды жауаптарын алды.
-Біз әдетте ауыл округ орталығына барып, шағын елді мекендерді ұмыт қалдырып кетеміз. Бүгінгі сапарымның кестесінен тыс елді мекендерге арнайы келіп, ауыл ақсақалдарына сәлем берейін деп арнайы келдім, – деді аудан басшысы. Сондай-ақ тұрғындардың көптен бері көтеріп жүрген мәселесі Раң ата мен Шаға елді мекенінде орталық көше жарықтандырылатынын жеткізді.
Кездесу барысында тұрғындар жайылымдық жер, электр жарығының төмендігіне тоқталды. «Оңтүстік жарық транзит» ЖШС Созақ ауданы бөлімшесінің басшысы Ғабит Елбергенұлы Шаға елді мекенінде ағымдағы жөндеу жұмыстары жүргізілетінін жеткізді. 2023 жылы инвестбағдарлама бойынша бағаналар мен трансформаторлар жаңаратынын айтты. Аудан әкімі Мұхит Сексенбайұлы, Раң ата елді мекенінде таза ауыз су саласындағы қордаланған мәселені тиісті бөлімге бір ай көлемінде шешуді тапсырды.
