Түркістан облысы Сайрам ауданында орналасқан №20 «Жаңақоғам» газ бөлістіру станциясында (АГРС) жылдық жоспарлы жөндеу жұмыстарының жүргізілу кестесіне сәйкес, 2022 жылдың 24 мамырынан басталды.
Ауданға қарасты Нұржанқорған, Қожақорған, Қосбұлақ, Ханқорған, Жаңатұрмыс, Шіркін, Құрлық, Қарабұлақ, Әсіларық, Оразалиев, Теспе, Ошақты, Қасымбек датқа елді мекендерінде табиғи газ берілуі тоқтатылған болатын. Бүгін аудан әкімінің орынбасары Мадияр Оразалиев Қарабұлақ ауылдық округіне барып, тұрғындарды газға қосу бағытында атқарылып отырған жұмыстардың барысымен танысып, бақылауына алды.
Нәтижесінде, Қарабұлақ, Нұржанқорған, Ханқорған, Қосбұлақ, Арыс ауылдарында жөндеу жұмыстары аяқталып, табиғи газға қосылды. Жалпы газ жүйесіне 7 мыңнан аса тұтынушы қосылмақ. Тарата айтқанда, Қарабұлақ ауылында 5200 тұтынушы, қалған 4 елді мекенде 1250 тұтынушы бар. “КазТрансгазаймақ” АҚ Сайрам ауданындағы бөлімшесі және «Интергаз орталық Азия» Акционерлік қоғамы «Шымкент» магистральды газ құбырлары тарапынан тұрғындарды табиғи газбен шұғыл түрде қамту үшін нақты жұмыстар жүргізілуде.
Тұрғындарды тез арада газбен қамту үшін барлық мүмкіндіктерін жасап отырған газ шаруашылықтарына Мадияр Мұхтарұлы өз атынан алғысын жеткізді. Қалған елді мекендер де көгілдір отынға қосылды.
