Сарыағаш ауданы, Құркелес ауылдық округі, Жаңаталап елді мекенінің тұрғындары көптен бері кездесулерде жол мәселесін көтеріп келген. Нәтижесінде аудан әкімінің бекіткен іс-шара жоспарына еніп, былтырдан бері аталған елді мекеннің барлық көшелері кезең-кезеңімен ретке келтірілуде.
Бүгінгі таңда Жаңаталап елді мекеніндегі жалпы ұзындығы 0,99 шақырымды құрайтын Наркөшкен және Серуен көшелеріне асфальт төсеу жұмыстары жүргізіліп жатыр. Сонымен қатар биыл аталған елді мекенде жалпы 10 көшеге шағал төсеу жұмыстары жүргізілетін болады. Қарқынды жүргізіліп жатқан құрылыс жұмыстары тамыз айының соңына дейін толығымен пайдалануға беріледі деп жоспарланып отыр.
Құркелес ауылдық округінің әкімі Қ.Иматов және аудандық жолаушылар көлігі және автомобиь жолдары бөлімінің басшысы А.Жапбаров асфальт төсеу жұмыстарының барысын қадағалап, мердігер мекемеге асфальт төсеу жұмыстарының сапалы болуын және белгіленген уақытта халық игілігіне берілуін тапсырды.
Айта кетейік, Құркелес ауылдық округі бойынша биыл жергілікті бюджет есебінен жалпы 27 көшенің 26,8 шақырымына асфальт және шағал төсеу жұмыстары жүргізіледі.
Былтыр Сарыағаш ауданында 34 көшеге орташа жөндеу жұмыстары жүргізілген. Ауыл арасындағы көпірлер мен өткелдер де ретке келтірілген. Өткен жылы «Ауыл ел бесігі» бағдарламасы аясында республикалық бюджет есебінен Қабланбек пен Ынтымақ елдімекендеріндегі 27 көшенің, яғни 42 шақырым жол орташа жөндеуден өткен. «Жұмыспен қамту жол картасы — 2020» бағдарламасы бойынша Сарыағаш қаласы мен Құркелес, Жібек жолы, Қабланбек, Қызылжар ауылдық окруктеріндегі 5 көшенің 9 шақырымы ретке келтірілген. Сонымен қатар, облыстық бюджет есебінен Құркелес пен Жарты төбе ауылдық окруктерін байланыстырып тұрған Келес өзені бойындағы көпірдің құрылыстары жүргізіліп, аяқталды. Аудандық бюджет есебінен Сарыағаш қаласының орталық С.Ысмайылов көшесінің 3,7 шақырымын орташа жөндеу жұмыстары, сондай-ақ су астауларын бұзу және ауыстыру, аяқ жолдарды салу жұмыстары атқарылған. Осылайша бірқатар ауылдар мен елдімекендерде көлік қозғалысына жағдай жасалып, ауқымды жұмыстар атқарылуда.
