Сауран ауданы Ескі Иқан ауылдық округінде 500 орындық жаңа емхана салынуда. Жеке кәсіпкер Адилбек Усманкулов есебінен бой көтеріп жатқан «Авиценна-А» емханасының жоба құны 1 млрд. 800 млн.теңгені құрайды.
Бүгінгі күнге дейін Ескі Иқан ауылдық округінде 1 қабатты «Авиценна-А» емханасы халыққа қызмет көрсетіп келген еді. Енді шағын емхананың аумағы ұлғайып, заманауи меденицалық құралдармен жабдықталуда. Кеңейтілген кешеннің жалпы аумағы 4600 шаршы метрді құрайды.
«Жаңа емхана соңғы үлгідегі озық технологиялармен жабдықталады. Халыққа сапалы мединицалық көмек көрсетіп, түрлі аурулардың алдын алу үшін мединицалық құрылғылардың сапалы болғаны аса маңызды. Осы мақсатта емханамызға құны 80 млн тұратын маммографиялық аппарат орнатуды жоспарлап отырмыз. Шет елден арнайы тапсырыспен алынатын бұл аппарат облыс бойынша тек Түркістан қалалық емханасында бар. Мұндай аппараттың біздің ауданымызда болуы да аудандағы денсаулық сақтау саласының дамуына үлкен үлес қосары сөзсіз», – дейді «Авиценна-А» емханасының бас дәрігері Акажан Сакашов.
Үш қабатты, екі блоктан тұратын жекеменшік емхана бір ауысымда 500 адамды қабылдауға қауқарлы. Сонымен қатар жаңа кешенде 100 төсек-орыны, әр палатаның жеке жуынатын бөлмесі, 2 жедел жәрдем көлігі бар. Жақында пайдалануға берілетін емхана 150 адамды жұмыспен қамтитын болады.
