16 маусым күні бастау алған «Біз нашақорлыққа қарсымыз» атты ұранмен аудан, қалалық «Жастар ресурстық орталықтары» қызметкерлері арасында бастау алып, салауатты өмір салтын насихаттау, жастарды спортпен белсенді айналысуға шақыру, салауатты өмір салтын қалыптастыру, жастар арасында футболды насихаттау және бұқаралық спортты дамыту мақсатындағы облыстық ашық біріншілік өз мәресіне жетті.
Сайыс барысында алаңға алғаш шыққан Сарыағаш және Төлеби ауданының жастар командасы тартысты ойын көрсетті. Сондай-ақ, Бәйдібек ауданы мен Түркістан облысының жастары және Мақтаарал ауданы мен Арыс қаласының жастарының ойындары да көпшілікті тәнті етті.
Шараның марапаттау рәсімінде Отырар ауданының әкімі Сәкен Сұлтанханов құттықтау сөз сөйлеп, сайыс қорытындысы бойынша жүлделі орындардан көрінген командаларға алғыс хаттар мен бағалы сыйлықтар тапсырды.
Тартысты ойын нәтижесінде, Мақтаарал ауданы 1-ші орынға ие болса, 2-ші орынды Жетісай ауданы, 3-ші орынды Сарыағаш ауданы иемденді.
Аудан әкімі мұндай шаралар жалғасын табатынын, жастар әрқашан назардан тыс қалмайтынын жеткізді. Сайысты тамашалауға келген көрермендер жарыстың сәтті өткеніне риза болып, қошеметтерін көрсетті.
