«Қызмет» мемлекеттiк, банк мекемелерi және қоғамдық қызмет көрсету қызметкерлерiнiң салалық кәсiподағы» қоғамдық бiрлестiгi Шардара аудандық филиалының ұйымдастыруымен Елорда күнiне орай «Қасиет» қызмет көрсету орталығында «Ағалар салған сара жол» тақырыбында ардагерлер, мемлекеттiк қызметшiлер мен мүмкiндiгi шектеулi жандар арасында бильярд, шахмат, дойбы, үстел теннисi және тоғызқұмалақтан жарыс өттi.
Жарыстың мақсаты – ардагерлер мен жастар арасындағы байланысты нығайту, мемлекеттiк қызметтiң беделiн көтеру.
Аудандық қоғамдық келiсiм кеңесiнiң төрағасы, еңбек ардагерi Қ.Iлесов шараның ашылу салтанатында сөз алып, жарысқа қатысушыларға сәттiлiк тiледi. Тартысты әрi қызықты өткен бәсекеде бильярд сайысы бойынша I орынды А.Тiлепов иемденсе, II орынды З.Оспанов қанжығасына байлады. Ал үздiк үштiктi Т.Мырзагелдиев қорытындылады. Дойбыдан қарсылас шақ келтiрмеген Қ.Бегалиев I орынды алса, С.Утаев жүлделi II орынды, ал А.Көбенова III орынды мiсе тұтты. Үстел тенисiнен ұлдар арасында I орынды А.Сәрсенбаев, II орынды А.Айдарбеков, ал екеуiнен айласын асыра алмаған М.Қошымов III орынға жайғасты. Дәл осы сайыс қыздар арасында да тартысты өтiп, I орынды О.Қалшабекова иемдендi. II орынды З.Арыстанова алса, үштiктi С.Ахметова түйiндедi. Қазақтың ұлттық ойыны саналатын тоғызқұмалақ сайысында ұлдар арасында Ө.Төлебаев алтыннан алқа тағынса, Е.Смайылов күмiспен күптелдi. Қыздар арасында М.Әбдiрахманова I орынды, С.Жүсiп II орынды жеңiп алды.
Орын алған барлық қатысушыларға дипломдар мен сыйлықтар табыс етiлдi. Сайыс соңы мерекелiк концертке ұласып, жарысқа қатысушылар би билеп, ән салып және де ұйымдастырушыларға өз ризашылықтарын бiлдiрдi.
