Бүгін Түркия елінің Стамбул қаласында бүкіл қол күрес әлемі асыға күткен Шығыс пен Батыс спортшылары арасындағы жекпе-жек сайысы өз мәресіне жетті.
Аталған сайыста Қазақ елінің атынан алғашқы жекпе-жекке шыққан Сарыбай Ердаулет, қарсыласы Түркиялық әлемнің бірнеше дүркін чемпионы Юсуф Илдызоглуны 3-0 есебімен жеңіп, Еліміздің намысын абыроймен қорғаса. Жарыстың ең басты сайысы Оңғарбаев Қыдырғали мен Америка Құрама Штаттарының атақты спортшысы Әлемнің бірнеше дүркін чемпионы Джон Брзенк арасындағы жекпе-жек өте тартысты әрі қызықты өтті. 3-1 есебімен жеңіске жеткен жерлесіміз Қыдырғали еліміздің абыройын асқақтатты.
– Дүние жүзіне танылып, өз саласы бойынша дарабоз бапкер болса да өзінің қарапайым болмысын сақтай білген Арман Қарсыбаевтың қос шәкірті Қыдырғали Оңгарбаев пен Сарыбай Ердәулет әлемдік додада атой салып, жеңіске жетті. Түрік елінің Стамбул қаласында қол күресі әлемінің кіл мықтылары өзара үздіктерді анықтайтын додада Шығыс пен Батыс спортшыларының 20 өкілі жекпе-жек өткізген болатын. Аталмыш кездесуде ел намысын қорғаған 3 спортшының екеуі Қызылдың құмында туылып, қазақы қасиетті бойына сіңіріп өскен, тек шағалалы Шардараның ғана емес күллі қазақтың атын әлемге танытқан, кісіліктің емес кішіліктің үлгісі бола білген Қыдырғали Оңғарбаев пен Сарыбай Ердәулет болды. Қыдырғалидай құрыш білекті батырдың қарсыласы «қол күресінің Тайсоны» атанған, Әлемнің 26 дүркін чемпионы, АҚШ байрағы астында өнер көрсететін атақты Джон Брзенк болса, Сарыбай Ердаулет әлемнің бірнеше дүркін чемпионы атанған түрік балуаны Юсуф Илдызоглумен күш сынасты. Елдегі жанкүйерлері мен ағайынның, күллі қазақтың қолдауы мен тілеуі дем берген шардаралық шарболат жігіттер айқын басымдықпен кездесулерде жеңіске жетіп, абыройымызды асқақтатты. Армреслинг спорттың олимпиадалық түріне кірмесе де әлемдік, халықаралық жарыстарда қазақтың туын көтеріп, Әнұранын шырқатып жүрген шарболат жігіттердің жеңісі – Арекең негізін қалаған «Shardara Armsport» клубының, қазақ елінің жеңісі деп білеміз, – дейді спорт жанашыры Бауыржан Найманов.
Жеңіс тұғырынан көрінген жерлестерімізді құттықтай келе, алдағы бұданда үлкен байрақты бәсекелерде ел намысын абыроймен қорғай берулерін тілейміз!
