Төлеби ауданында астық ору науқаны басталды. Аймақта жалпы 15 мың гектар жерге күздік және жаздық бидай егілген.
Өңірде егін оруға қажетті 57 комбайн, 500-ден астам агротехника бар. Диқандар егістіктің әр гектарынан 20-25 центнерге дейін өнім алуды жоспарлауда.
Астық оруды аудандағы ірі шаруашылықтардың бірі «Қазығұрт» өндірістік кооперативі бастап кетті. Аталған қожалықтағы 1 400 гектар егінді алқапқа егілген арпа мен бидайды жинауға 10-ға жуық агротехника тартылып, онда 20 шақты жұмысшы еңбек етуде.
Түркістан облысында биыл ауыл шаруашылығы дақылдары 851 мың гектарға орналастырылып, дала жұмыстары толығымен аяқталды. Егіс көлемі өткен жылдан 5,5 мың гектарға ұлғайды (2021 ж. – 845,5 мың га).
Егістікті әртараптандыруға сәйкес, масақты дақылдардың егіс көлемі 7,1 мың гектарға артып, 248,6 мың гектарға орналастырылды (оның ішінде бидай – 201,2 мың га, арпа – 47,5 мың га).
Астық оруға қолда бар 800-ге жуық комбайнның 90-95%-ы қатысуда. Бүгінгі күнге 23,5 мың гектар астық орылып (10%), гектар түсімділігі 17,2 центнерді құрады, 40,3 мың тонна астық қамбаға құйылды. Биыл алдын ала жасалынған болжамдық есеп бойынша әр гектардан орташа 18,7 центнерден, жалпы 465,1 мың тонна өнім жиналады деп күтілуде. Бұл өткен жылғы көрсеткіштен 203 мың тоннаға артық.
