
Мемлекет басшысының шалғай елді мекендерді сапалы ауыз сумен қамтамасыз ету жөніндегі тапсырмасына сәйкес Түркістан облысында инженерлік-коммуналдық инфрақұрылымды дамыту бағытындағы жұмыстар жүйелі түрде жүргізіліп келеді. Бұл бағыттағы жобалар облыс әкімі Нұралхан Көшеровтің жіті бақылауында. Ауыз су инфрақұрылымын жаңғырту Төлеби ауданының әлеуметтік-экономикалық дамуына да оң әсерін тигізеді. Сапалы әрі үздіксіз сумен қамту – халықтың өмір сүру сапасын жақсартудың, қоғамдық денсаулықты сақтаудың және елді мекендердің өркендеуінің маңызды факторы.
Өңір басшысы Нұралхан Көшеров Төлеби ауданына жұмыс сапары барысында Леңгір қаласындағы «Достық-2» су ұңғымасының жай-күйімен және атқарылған жұмыстардың нәтижесімен танысты.
Қала тұрғындарын сапалы әрі үздіксіз ауыз сумен қамтамасыз ету мақсатында «Достық-2» су ұңғымасын тазарту және ағымдағы жөндеу жұмыстары жүргізілген. Жобаны «STROY SYSTEM INC» жауапкершілігі шектеулі серіктестігі жүзеге асырған. Жұмыстар 2025 жылдың желтоқсан айында аяқталған. Жобаның жалпы құны 196,6 млн теңгені құраған.
Бүгінде Леңгір қаласында 33 848 тұрғын тұрады. Қала бойынша 8 280 абонент ауыз сумен қамтылған. Тәуліктік су тұтыну көлемі 8 962 текше метрді құраса, су жүйесіне тәулігіне шамамен 12 мың текше метр су беріледі.
Қаладағы магистральдық су желілерінің ұзындығы 35,2 шақырымды, ішкі су желілері 144 шақырымды құрайды. Ал үш негізгі су резервуарының жалпы жобалық сыйымдылығы 14 мың текше метрге жетеді. Бұл инфрақұрылым қала тұрғындарын орталықтандырылған ауыз сумен қамтамасыз етуде маңызды рөл атқарады.
Аталған жоба аясында жобалау-сметалық құжаттаманы әзірлеуге 124 млн 611 мың теңге қарастырылған. Оның ішінде 32 млн 625 мың теңге аудан бюджетінен, 91 млн 986 мың теңге облыстық бюджет есебінен бөлінген. Нәтижесінде су ұңғымасын тазарту және жөндеу жұмыстары толық аяқталған.
Жұмыс сапары барысында облыс әкімі ауыз сумен қамту мәселесінің тұрғындар үшін айрықша маңызға ие екенін атап өтті. Сондай-ақ су жүйелерінің үздіксіз жұмыс істеуін қамтамасыз етіп, инженерлік инфрақұрылымның техникалық жағдайын тұрақты бақылауда ұстауды тапсырды.
Жалпы, ауыз су инфрақұрылымын жаңғырту – халықтың тұрмыс сапасын арттыруға бағытталған маңызды әлеуметтік жобалардың бірі. Су ұңғымаларын жөндеу, желілерді жаңарту және су қорын тиімді пайдалану тұрғындардың күнделікті қажеттілігін өтеумен қатар, елді мекендердің тұрақты дамуына негіз қалайды.
Леңгір қаласындағы «Достық-2» су ұңғымасын жаңарту жұмыстары да осы мақсатқа бағытталған. Мұндай жобалардың жүзеге асуы тұрғындардың сапалы ауыз суға қолжетімділігін арттырып, халықтың денсаулығы мен санитарлық қауіпсіздігін қамтамасыз етуге ықпал етеді.
