Бүгінде Төлеби ауданының кәсіпкерлері мемлекет тарапынан жүйелі ұйымдастырылған қамқорлықты сезіне бастады. Кәсіпкерлік субъектілеріне қолдау білдіру, отандық бизнеске қолайлы жағдай туғызу мақсатында көптеген ауқымды іс-шаралар атқарылуда.
Шағын және орта бизнес өкілдеріне жұмысын жандандыру бағытында қайтарымсыз грант пен жеңілдетілген несиелер берілуде. Мысалы, жеке кәсіпкер Асқар Маратұлы 2021 жылы Түркістан облысының аймақтық үйлестіру кеңесінің конкурсына “Құрғақ шайды фасовка жасау” жобасымен қатысып, 5 млн теңге грант ұтып алды.
Бүгін Көксәйек ауылдық округіндегі іссапар барысында аудан аумағы мен Шымкент қаласын, көршілес аудандарды құрғақ шаймен қамтып отырған шағын цехтың жұмысы таныстырылды. Цехты іске қосқан жеке кәсіпкер Қалиев Асқат Маратұлы жұмыс орнымен таныстырып, 150 грамдық 140 қорап шай дайындайтындығын көрсетті.
Құрғақ шайды фасовка жасаумен 3 адам айналысып, олар тұрақты жалақы алуда. Цехта күніне 30 кг шай фасовкаға салынады. Үш түрлі құрғақ шайды қорапқа салумен айналысатын цех шикізатты Ташкент қаласынан арнайы алдырады. Фасовкаланған шайлар ауданның сауда орындарына жеткізіліп, сатылымға шығарылуда.
Мемлекет тарапынан бизнесті қолдауға арналған мүмкіндіктер туралы халықты жан-жақты ақпараттандыру жұмыстары тұрақты жүргізілуде. Халықпен кездесулерде, әкімдік отырыстары, жеке қабылдауларда кәсіпкерлерді қолдауға арналған мемлекеттік бағдарламалар жөнінде жиі айтылып келеді. Шағын және орта бизнес субъектілері экономиканың қозғаушы күші ретінде танылуда. Сондықтан, бұл саланы дамыту – бүгінгі күннің басты талабы.
