Биыл – Жеңіске 77 жыл. 1418 тәулікке созылған Ұлы Отан соғысында майданға аттанған 10862 жерлесіміз бүгінгі бейбіт күн үшін өшпес ерлік үлгісін көрсете біліп, 5 жерлесіміз Кеңестер Одағының Батыры атағын иемденсе, жүздеген жауынгеріміз І және ІІ дәрежелі «Даңқ» орденінің кавалері атанды.
Бұл сұрапыл соғыс мемлекетіміз үшін ең ауыр соққы болғанымен, еліміздің бетке ұстар ержүрек батыр бабаларымыздың арқасында бүгінде тәуелсіз мемлекет атанып отырмыз.
Ата-бабаларымыздың ерен ерліктерін мәңгі есте сақтап, рухани тағзым ету соғыстан елімізді аман сақтап, болашақ ұрпаққа аманат етіп қалдырған қазақ батырлары тарих төрінен мәңгілікке орын алды.
Осы ретте, Төлеби ауданы Көксәйек ауылдық округінде ҰОС қатысушыларына арналған ескерткіш-мемориалдың ашылу салтанаты өтті. Мерекелік басқосуға аудан әкімі Төлеген Телғараев, аудандық мәслихат хатшысы Нұрлан Қойбағаров қатысып, биіктігі 5м, ені 16м, ұзындығы 26 құрайтын мәрмәр тастан жасалған кешенді ашып, мәңгілік алауға гүл шоқтарын қойып, оның ашуылуымен аудан жұртшылығын құттықтады.
«Өткенді ұлықтау – өскендіктің белгісі» деген қанатты сөз бар. Осыған орай, отаны үшін отқа түскен 874 жауынгердің есімі ескерткіш-мемориалға ойылып жазылуы, ел жадында мәңгіге сақталады деп білеміз.
