Төлеби ауданы Ленгір қаласының аумағы жыл өткен сайын кеңейіп, мемлекеттік бағдарлама аясында көпқабатты тұрғын үйлер саны артып келеді. Нәтижесінде, тұрғындар саны да артып, тұтынушылар көбеюіне байланысты, кәріз жүйелерін ретке келтіру қажеттігі туындап отыр.
Қала аумағындағы көпқабатты үйлердің қажеттігін өтеп келген №3-ші кәріз тазалау жүйесінде 2017 жылға дейін үш фильтрациялық алаңы болған. Кейіннен тұрғындардың сұранысына сәйкес, бюджеттен қаржы қаралып, 12 шұңқыр қазылып, кәріз жүйесінің аумағы қоршалып, жарықтаныдырылды. Жол төселіп күзетшінің ғимараты салынды.
Уақыт өте келе көпқабатты тұрғын үй саны артуына байланысты, №3-ші кәріз жүйесінің қуаты қауқарсыз екендігі анықталды.
Қала тұрғындары кәріз жүйесіне қатысты мәселені халықпен кездесулерде, жеке қабылдауларда жиі көтеріп келеді. Аталған мәселемен танысып, оны шешу жолдарын қарастыру мақсатында мамандардың пікірін тыңдап, бүгінде ескі кәріз жүйесіне қосымша жаңа жүйе құрылысын жүргізу қажеттігі белгілі болды. Бұл мақсатта қала аумағынан 40 га жер бөлініп, оның құжаттары заңдастырылды.
АMANAT партиясының сайлауалды уәделерді орындау бойынша Жол картасының индикаторын орындау бағдарламасының 2,4,1 және 2.4.2, тармақтары, 2.4.3 тармағына сәйкес, жаңа кәріз жүйесін іске қосу үшін құрылыс жұмыстарының жоба-сметалық құжаттары дайындалды. Жоба құны 2,6 млрд теңгені құрайды. Қаржыландыруға облыстық салалық басқармаларға ұсынылып, облыстық мәслихаттың сессиясына қаралып, қолдауға ие болды.
Қазіргі кезде жоба қаржыландырылып, “3-Кәріздік тазарту қондырғысының” (КОС-3) құрылысын жүргізу үшін мердігер мекемені анықтау мақсатында мемлекеттік сатып алу конкурсы өткізілуде.
Мердігер мекеме анықталып, құрылыс жұмыстары аяқталғаннан кейін тазаланған шайынды суды кәріз орналасқан 7 мың текше метрді құрайтын екі фильтрлік алаңға жинақтап, шыққан су егістік алаңдарына жіберу жоспарлануда.
