ҚР Президенті Қасым-Жомарт Кемелұлының 2022 жылғы 3 наурыздағы №826 Жарлығына сәйкес, Төлеби ауданының әкімі Төлеген Телғараевтың халықпен кезекті оныншы кездесуі Көксәйек ауылдық округінде жалғасын тапты. Кездесу күнтізбесі алдын ала облыстық мәслихатпен бекітіліп, оны аудандық мәслихат хатшысы ашып, жүргізіп отырды.
Халықпен кеңесу, ұсыныс-пікірлерін тыңдау, сұрақтарына жауап беру мақсаттағы басқосуда аудан әкімі Төлеген Тұртайұлы 2021 жылғы әлеуметтік-экономикалық даму көрсеткіштерінің қорытындысы және 2022 жылы атқарылатын жұмыстар жөнінде баяндады.
Көксәйек ауылдық округінде 2021 жылы атқарылған жұмыстар барысына тоқталар болсақ, Көксәйек елді мекені Жастар, Төлеби, Жұмжаев, Тұрсынбаев, Баба ата көшелерін табиғи газбен қамту үшін оның ЖСҚ әзірленіп, қаржы қаралды. Округке қарасты 8 көшеге электр желілерін жүргізу және трансформатор орнатуға арналған құрылысты аяқтау бағытында қаржыландырылды. Көксәйек елді мекеніндегі жаңа массивке инженерлік-коммуникация жүйелерінің құрылысын жүргізу бағытында қаржы бөлінді.
Сондай-ақ, елді мекенде орналасқан Мәдениет үйі табиғи газға қосылып, аудандық аурухана маңына бағдаршам қойылды. Округте 2022 жылы жүзеге асып жатқан жобаларды таныстыра кетсек, Жіңішке, Қазақстан, Көксәйек елді мекендеріндегі ауыз су жүйесін жөндеуден өткізу жұмыстары қолға алынған. Қазақстан елді мекеніндегі Жұмжаев көшесінің 2,0 шақырымы мен Жіңішке елді мекенінің 3,1 шақырымы жарықтандырылды.
Еркін форматтағы кездесуде округ халқы өздерін толғандырған сұрақтарын қойып, елді мекенде атқарылып жатқан жұмыстар мен қолға алынған жобаларға қатысты ұсыныстарын айтып, пікірлерін жеткізді.
