Президент Қасым-Жомарт Тоқаев өзінің Қазақстан халқына Жолдауында: «Халықтың денсаулығын жақсарту мәселесі айрықша назар аударуды талап етеді. Барлық жастағы ел азаматтары арасында бұқаралық спортты дамыту маңызды. Спорт инфрақұрылымдарының балалар үшін барынша қолжетімді болуын қамтамасыз ету керек. Бұқаралық дене шынықтыруды өркендету ісі жаңа чемпиондар шыңына шығатын пирамидаға айналуы тиіс деген болатын. Осыған орай Түркістан облысы, Түлкібас ауданында халықаралық «EAGLES OF TURKISTAN» атты страйкболдан ашық чемпионатының жеңімпаздары анықталды.
Түркістан облысы әкімдігінің қолдауымен, облыстық мәдениет және туризм басқармасына қарасты «Open Turkistan» туристік ақпараттық орталығы ұйымдастырған чемпионатқа көршілес елден 3 топ қатысты. Екі күн бойы шетелдік және қазақстандық 10 команда құрамындағы 70 қатысушы Тұрар Рысқұлов ауылының полигон алаңында өз шеберлігін көрсетті. Түлкібас ауданы әкімінің орынбасары Ербол Орманов марапаттау рәсіміне қатысып, жеңімпаздарды құттықтады. Шекара асып келген көршілес ел мен қызығушылық танытқан барлық қатысушыға ризашылығын білдірді.
Финалда Бішкек қаласының «Legion» және «Pokémon’s» командалары өзара сайысты. Нәтижесінде 1-орынды «Legion» командасы жеңіп алып, 700 мың теңгелік сертификатқа ие болды. 2-орынды «Pokémon’s» тобы иеленіп, 500 мың теңгені қанжығалады. Ал, 3-орынды алматылық «Beta FBI HRT» командасы иеленіп, 300 мың теңгенің сертификаты берілді. Ойын барысында мергендігімен көзге түскендерге арнайы сыйлықтар табысталды. Жарыстың жалпы жүлде қоры – 1,5 млн. теңге.
Осылайша, Түлкібаста тек экстремалды-спорттық бәсекені өткізіп қана қоймай, шетелдік және отандық командаларға Түлкібас ауданының туристік әлеуетін таныстыру және экотуризм бағытын насихаттауға басымдық берілді.
Жобаны ұйымдастырушы «Open Turkistan» туристік ақпараттық орталығы жастардың ұсынысы негізінде жүзеге асқан ерекше форматтағы жобаның ауқымын ұлғайтып, жалғастыруды жоспарлап отыр. Еске салсақ, «EAGLES OF TURKISTAN» халықаралық ашық чемпионаты 15 шілде күні басталған болатын. Оған Алматы мен Ақмола облыстары, Алматы және Шымкент қалаларынан ойыншылар келіп, қатысты. Түлкібас ауданындағы полигонға қатысушылар мен көрермендерді қосқанда 200-дей адам жиналды.
Бүгінде Түркістан облысында бұқаралық спортты дамытуға және салауатты өмір салтын қалыптастыру бағытында ауқымды жұмыстар атқарылып жатыр. Халықтың денсаулығын нығайту мақсатында өңірде соңғы 5 жылда 45 спорттық нысан бой көтерген. Мәселен, 2019 жылы Түркістан қаласында «Олимпиадалық резервін дайындау орталығы», 2020 жылы UEFA-ның халықаралық талаптарына сай 7000 адамға лайықталған «Turkistan Arena» стадионы қолданысқа берілді. Бұдан бөлек, 2021 жылы «Olympic Center» спорт кешені ашылса, 2022 жылы халықаралық теннис орталығы ел игілігіне тапсырылды. Елімізде теңдесі жоқ орталықта 11 теннис корты, көрермендерге арналған жиналмалы мінбелер, әмбебап және балалар ойын алаңы бар.
Бүгінде Түркістан қаласы спорт орталығына айналып келеді деуге әбден негіз бар. Сөзіміздің бір дәлелі – Түркістан тарихында тұңғыш рет қысқы спортпен кәсіби түрде айналысу үшін мүмкіндік жасалып отыр. Мұз сарайының құрылысы таяуда аяқталды. Спорт кешені 1200 көрерменге арналған, 30×60 метр көлеміндегі мұз айдынында шайбалы хоккей, мәнерлеп сырғанау, балалар арасында шорт-трек сайыстарын тамашалауға мүмкіндік бар. Сондай-ақ, қазіргі таңда Бекзат Саттарханов атындағы спорт кешенінің қайта құру жұмыстары жүргізіліп, олимпиадалық үлгідегі ескек есу каналы бағытындағы спорт кешені бой көтеріп жатыр. Бұдан бөлек, өңірдегі аудандарда демеушілер, жеке кәсіпкерлер немесе ауыл тұрғындары тарапынан спорттық кешендер, футбол алаңдары, стадиондар, жаттығу және күрес залдары, жабық спорт кешендері қолданысқа берілген. Жалпы, өңірде тұрғындардың спортпен айналысуына қолайлы жағдай жасалып жатыр. Қазіргі таңда облыста спортпен шұғылданатын барлық жастағы тұрғындар саны 823 896 адамға жетіп, бұл өңірдегі халықтың 39 %-ын құрап отыр.
