ТҮРКІСТАН: ТҮЛКІБАСТЫҚТАР «МЕКТЕБІҢЕ ДОМБЫРА СЫЙЛА» АКЦИЯСЫН САУРАНДЫҚТАРҒА ЖОЛДАДЫ

329

Домбыра – қазақтың киесі, қа­сиеті, қазынасы. Қазақ пен дом­быра егіз ұғым ғой! Күні кешеге дей­ін әр үйдің төрінде ілулі тұра­тын ұлттық аспабымыздың күм­бірлеген үні бүгінде алыстап бара жат­қандай еді. Телеарналардан домбыраның дауысын есту мұңға айналғаны былай тұрсын (оның орнын салмақсыз бағдар­ла­малардың жаулап алғаны шын­дық), шілдехана, бесік тойы, тұ­сау­­кесер, тілашар, беташарла­ры­мыз даңғырлаған эстарада әуеніне байланбады ма?

Былтыр Тәуелсіздігіміздің 30 жылдық мерейтойына орай Түлкібас ауданында бастау алып, биыл «Балалар жылы» аясында жалғасын тапқан «Мектебіңе домбыра сыйла» акциясы аудандық мәдениет үйінде қорытындыланды. Ұлттық домбыра күніне орайластырылған шараға Түлкібас ауданы әкімінің орынбасары Е.Орманов, аудандық мәслихаттың хатшысы С.Сейсенбаев, Сауран ауданы әкімінің орынбасары С.Сәдібаев, аудандық адами әлеуетті дамыту бөлімінің басшысы Е.Қадірбек, мектеп директорлары мен зиялы қауым өкілдері және аудан тұрғындары қатысты.

Мерекелік жиында аудан әкімінің орынбасары Е.Орманов пен мәслихат хатшысы С.Сейсенбаев аудан жұршылығын мерекелерімен құттықтап, акцияға белсенді қатысқан азаматтарға аудан әкімінің Алғыс хатын табыстады. Осы ретте мереке күнге орайластырылған шара барысында Тұрар Рысқұлов мектебінен кейін эстафета тізгінің ұстаған Бауыржан Момышұлы мектебінің домбыра үйірмесіне 50 домбыра сыйға тартылды. Содан соң эстафетаны аудан әкімінің орынбасары Ербол Керімбекұлы саурандық әріптесі Серік Өмірханұлына табыстады. Тиісінше Серік Өмірханұлы саурандықтардың атынан естелік сыйлығын табыс етіп, аудан жұртшылығын айтулы мерекемен құттықтады.

Жиын жалғасы аудандық өнер мектебінің жас өнерпаздары мен аудандық мәдениет үйінің қызметкерлерінің орындауындағы концерттік бағдарламаға ұласты. Елуден астам жас домбырашы ұлттық аспабымызда күй шертіп, көпшіліктің қошеметіне бөленді.

Айта кетерлік, өткен жылдың аяғында бастау алған акция барысында ауданымыздағы мектептерге сол мектептің түлектері, депутаттар мен кәсіпкерлер, ардагер ұстаздар мен ауыл тұрғындары тарапынан 400-ге жуық домбыра сыйға тартылды.

Айта кетейік, жыл сайын шілденің алғашқы жексенбісіне дөп келетін, ұлттық аспабымызды ұлықтауға арналған бұл мереке 2018 жылдан бері елімізде кеңінен аталып өтеді.

Есте болса, 2018 жылдың 13 маусымында қоғамды ұлттық мәдениет пен бірегейлікті сақтау мен қайта жаңғырту идеясының төңірегінде одан әрі топтастыру мақсатында шілденің бірінші жексенбісін Ұлттық домбыра күні ретінде белгілеу туралы Жарлық жарық көрді. Сол жылы шілдедегі алғашқы жексенбі 1-і күніне дөп келіп, сол күні елорданың «Қазақ Елі» монументі алдындағы алаңға жиналған 2 мыңнан астам музыканттан құралған домбырашылар оркестрі «Көңіл ашар», «Адай», «Балбырауын», «Ерке сылқым», «Сарыарқа» күйлерін орындаған еді.

Халқымыз домбыраға үкі тағып, төріне ілген. Күйшілерді төредей күтіп, төбесіне көтерген. Осы игі үрдіс қазір де жалғасып келеді. Осыдан екі жыл бұрын домбыра күні шілденің алғашқы жексенбісі 7-сі күніне тұспа келді. Бұл күні де елордадағы Қазақ елі монументінің алдындағы алаң үлкен сахнаға айналып, домбырашылар бір мезетте домбыра шанағанын «Сарыарқа», «Адай», «Әлқисса», «Көңіл толқыны», «Балбырауын» және «Көреғұлы» күйлерін төгілтті. Мерекелік концертті тамашалаған Мемлекет басшысы Қасым-Жомарт Тоқаев қазақстандықтары құттықтай келе: «Домбыра – бүкіл Қазақстан халқын біріктіретін теңдесі жоқ мәдени мұра. Ұлттық руханиятымызды дәріптейтін мереке домбыраның мәртебесін биікке көтере берсін! Баршаңызға рахмет, аман болыңыздар, құрметті ағайын!», – деген болатын. Биыл да Ұлттық домбыра күні елімізде кеңінен аталып өтілуде.

Домбыра күнінің белгіленуі жайдан-жай емес. Бұл рухани жаңғыру бағытындағы ең сүбелі тірліктің бірі болмақ. Осы күннің аясында ұлттық аспабымызды ұлықтау мақсатында тың бастамалар бой көтеріп, көптен бері қолдау таппай жүрген игі дүниелер қайта жаңғыруы ғажап емес. Көп нәрседен үміттіміз. Көк сандықтан домбыра үнімен астастырылған салмақты дүниелердің көптеп жарық көруін жанымыз қалайды. Ең дұрысы, науқаншылықтан ада, әсіреқызыл тез оңарлық тірлік емес, өзінің қоңыр үні мен қоңыр болмысына сай, ұлтымыздың жадын қайта бір жаңғыртатындай күн болса екен дейміз.