Мемлекет басшысы Қасым-Жомарт Тоқаевтың сұхбатыда айтылғандай есте жоқ ескі заманды аңсамай, лингвистикалық мәдениеттің айналасын шиырлай бермей, тарихымызды да дәріптеп, салт-дәстүрімізді сақтай отырып, алға ұмтылуымыз қажет. Қазақ халқының ұлттық дәстүрі – ұлттық рухтың тайқазаны. Әдет-ғұрып, салт-дәстүрді жеке адам емес, бүкіл қоғам бірлесіп жасайды. Халық ұлт болып өмір сүруі үшін оның әдет-ғұрып, салт-сана түріндегі ұлттық дәстүрлері болуы қажет. Жер бетінде қазақ деген ұлт болып кеңінен танылуымыз үшін, ұлттық сана сезімімізді оятып, ұмыт болуға таяған салт-дәстүрлерімізді қайта жаңғыртуды міндетін деп біліп, қолға алуымыз керек. Бабалар салып кеткен дана жолмен, ата салтымызбен өмір сүру – ұлттығымыздың басты міндеті. Дәстүрге сай өмір сүру, оның кейбір тұстарын заман талабына сай жаңғырта, бейімдей отырып қолдану – өнершілдіктің белгісі.
Мақала аясында «Өнерлі өлке» облыстық өнер фестивалі аясында Түлкібас ауданының Түркістандағы мәдениет күндері өз мәресіне жетті. Мерекелік шараны «Салт дәстүр – сан ғасырлық саф мұра» атты ән, жыр мен ұлттық салт-дәстүрлер көрінісі қорытындылады. Этноауылда киелі шаһарға келген туристерге түлкібастық өнерпаздар бесікке салу, құда түсу, қыз ұзату, беташар, тұсау кесу сынды әдет-ғұрпымызды таныстырды.
Шараның алғашқы күні «Visit Turkistan» орталығы алаңында аудан өнерпаздарының қатысуымен гала-концерт өткен болатын. Мұнда Түлкібас ауданының мақтаныштары – Сәкен Қалымов, Индира Расылхан, Мамадияр Таукеев бастаған елімізге танымал жұлдыздар өнер көрсетіп, қала тұрғындары мен қонақтарын ән мен жырға бөледі. Мерекелік кешке аудан әкімінің орынбасары Ербол Орманов, Түркістан облысы мәслихатының депутаты Нұрайым Шахимерген және облыстық мәдениет және туризм басқармасының бөлім басшысы Мұқағали Кенжетайұлы қатысқан болатын.
Ал өнер додасының екінші күнінде этноауылда фото, қылқалам, қолөнер шеберлері, «Ақсу-Жабағылы» мемлекеттік табиғи қорығының және «Сайрам-Өгем» мемлекеттік ұлттық паркінің этнографиялық коллекциялық көрмесі жасақталған. Сондай-ақ спорттық ойындардан сайыс өтіп, жеңімпаздар марапатталған болатын.
Айта кетейік, аталмыш фестиваль шілде айының соңына дейін өтеді. Келесі көшті 26-28 мамыр аралығында Созақ ауданының өнерпаздары жалғастырады.
