«Қауіпсіз ел» ұлттық жобасының негізгі мақсаты – азаматтар мен мемлекеттің қауіпсіздігін қамтамасыз ету.
Осы орайда, 2022 жылдың мамыр айында Түркістан қалалық Полиция басқармасына қала тұрғындарының бірі көршісінің үйінде жанжал болып жатқаны бойынша хабарлама түсірген болатын. Ақпарат алысымен оқиға болған жерге полицейлер жедел барып, жағдайды анықтады.
Нақтырақ айтсақ, полицейлер жанжал болған үйге кіргенде жерде жатқан орта жастағы азаматтың өлі денесін тапқан. Тиянақты тексеру барысында полицейлер кісі өліміне қатысы бар деген күдікпен орта жастағы азаматты анықтап, басқармаға жеткізді. Күдіктіден жауап алу барысында оның досымен бірге ішімдік ішкені белгілі болды.
Яғни 2 дос бас қосу кезінде 4 шөлмек араққа сылқия тойып алып, жанжалдасқан. Нәтижесінде бірі екіншісінің маңдай тұсынан бірнеше рет соққы беріп, жарақат салады.
Содан ауыр жарақат алған азамат ес түссіз еденге құлап, оқиға орнында тіл тартпай кеткен.
Күдікті ретінде ұсталған жігітке қатысты ҚР ҚК-нің 106-бабы «Денсаулыққа қасақана ауыр зиян келтiру» бойынша сотқа дейінгі тергеп-тексеру амалдары жүргізіліп, қылмысы толық дәлелденді. Ал жинақталған құжаттардың барлығы сотқа жолданды. Сот 35 жастағы жігітті кінәлі деп танып, 9 жылға бас бостандығынан айыруға үкім етті.
Айта кетейік, «Қауіпсіз ел» ұлттық жобасы шетелден қару-жарақ пен техника сатып алуға ғана емес, сондай-ақ отандық қару-жарақ үлгілерін әзірлеуге, инфрақұрылымды жетілдіруге, әскерді цифрландыруға байланысты міндеттерді шешуге мүмкіндік береді.
