Биылғы сәуір, мамыр, маусым айларында Отырар ауданының әкімі Сәкен Сұлтанханов аймақтағы барлық ауыл округтердің тұрғындарымен кездесу жиынын өткізіп, әрбір елді мекеннің өзекті мәселелерін тыңдаған болатын. Кездесу нәтижесінде аудан бойынша 95 мәселе көтеріліп, күн тәртібіне енгізілді. Тұрғындардың көпшілігінің көтерген мәселесі ауыз су, ағын су, жайылым жер мәселесі, табиғи газ, жол жөндеу, мектеп, балабақша, емхана, спорт және ойын алаңшаларын салу, интернет желісі, аяқжол, жарықтандыру, абаттандыру және тағы да басқа мәселелер болып отыр.
Бүгін аудан басшысы Балтакөл ауылында кезекті кездесу жиынын өткізіп, тұрғындарға бұған дейін өткен кездесуде көтерілген мәселелердің орындалу барысын баяндады.
Естеріңізде болса сәуір айында өткен жиында ауыл тұрғыны Нағашбек Азаматов Ақкөл каналына механикалық тазалау жұмыстары жүргізілсе деген өтінішін айтқан болатын. Нәтижесінде аудан әкімінің тапсырмасына орай «Қазсушар» РМК-ның тарапынан механикалық тазалау жұмыстарын жүргізу үшін 1 дана эксковатор техникасы бөлініп, Балтакөл ауыл округіндегі «Ақкөл» каналының 9 км және қосымша Қонай каналының 4 км арнасына механикалық тазалау жұмыстары жүргізілді. Сондай-ақ ауыл тұрғыны М.Абишованың өтінішімен Құжатсыз монша жайын салған ауыл тұрғыны А.Жұмабековке жазбаша ескерту берілді. Мұнан өзге де мәселелер назарға алынып, орындалу үстінде.
Ағымдағы жылы балтакөлдік ағайындар үшін де ауқымды жұмыстар атқарылмақ. Атап айтқанда, Балтакөл елді мекеніндегі орталық көше Т.Әбуова көшесінің 1,3 шақырымы шілде айында асфальт жол төселіп, пайдалануға берілсе, 2022 жылдың соңына дейін Көлқұдық ауылындағы М.Арыс көшесінің 1,4 шақырымына, Ақкөл ауылындағы Қ.Азаматов көшесінің 800 метріне тас төселеді деп күтілуде. Сондай-ақ Балтакөл ауылында ойын алаңшасы салынатын болады. Қазіргі таңда мемлекеттік сатып алу рәсімі өткізілуде. Сонымен қатар, Балтакөл елді мекеніндегі ауыз су жетіспеушілігін болдырмау мақсатында ауыз су жинау нысаны (резервуар) салу үшін сметалық есептеу әзірленіп, жергілікті бюджеттен қажетті қаржы қаралған. Бүгінде мемлекеттік сатып алу шаралары ұйымдастырылуда. Аяқталу мерзімі 2022 жылдың қараша айына жоспарлануда.
Кездесу барысында тұрғындар өзге де мәселелер бойынша ұсыныс-пікірлерін айтып, жалпы аудан әкімінің атқарып жатқан жұмыстарына ризашылықтарын жеткізді.
Кездесуден соң аудан басшысы тұрғындарды жеке мәселелері бойынша қабылдап, талап-тілектерін тыңдады. Қабылдауға келген тұрғындар жұмыссыздық, әлеуметтік көмек, ауыл шаруашылығы саласы бойынша жеңілдіктерді алу, жайылымдық жер мәселелері бойынша өтініштерін айтып, жауапты сала басшыларынан заң аясында тұщымды жауаптар алды.
