Облыс спортының дамуына сүбелі үлесін қосып келе жатқан «Тұран» спорт ойын түрлері клубы ұжымы жарқын жетістіктерін қорытындылады. Жиында үздік спортшылар марапатталып, оларға құрмет көрсетілді. Бұл күн түркістандық кәсіби спортшылар үшін ерекше күн болды.
Еліміздің спортының өркендеуіне мол үлестерін қосып келе жатқан Түркістан облысының «Тұран» спорт ойын түрлері клубын ғаламат жеңістері мен жетістіктерін елге паш етті. Футбол, гандбол және волейболдан жоғары лигада өнер көрсететін ерлер мен әйелдер арасындағы командасы да екінші орыннан көрінді. Сонымен қатар, ұлттық лигада сынға түсетін баскетболдан әйелдер командасыда да Қазақстан чемпионатында көш бастады. Осындай жақсы жаңалықтарымен жанкүйерлерін қуантқан жиында Түркістан облысы әкімінің орынбасары Сәкен Қалқаманов тәуелсіз еліміздің спортының жаңғыруында жерлестеріміздің бұл ірі жетістіктерін жоғары бағалайтынын жеткізді.
Айта өтерлігі, облыс намысын волейболдан Қазақстан чемпионатында қорғап келе жатқан түркістандықтар өткен жылы күміс жүлдегер атанған болатын. Ал, гандболдан сынға түсетін саңлақтарымыз тур ойындарында да көш бастап келеді. Ал, жасыл алаңда талай жеңіске жетіп келе жатқан «Тұран-Томирис» қыздар футбол командасы 2021 жылы жүлделі екінші орын иеленгенін жанкүйерлер жақсы біледі. Нәтижесінде түркістандық кәсіби футболшы қыздар УЕФА чемпиондар лигасына жолдама алды. Бұл туралы білікті басшы, «Тұран» спорт ойын түрлері клубы директоры Сабыржан Бұлдырықов айта өтіп, айқын мақсаттарға жерлестеріміздің ыстық қолдауларының арқасында қол жеткізіп келе жатқанын тілге тиек етті.
Бұл кәсіби клубтың құрылғанына көп уақыт өте қоймаса да күні бүгінге дейін осындай жарқын жетістіктерімен көпшілікті қуантуда. Басқосуға арнайы қатысқан ел ағалары Қуаныш Айтаханов пен Дархан Мыңбай сынды азаматтар саңлақтардың бұл жеңістеріне жоғары бағаларын берді. Түркістан облысының спортын басқарып отырған Қанат Жолдықараев пен облыстық соттың төрағасы Тұрысбек Мыятбеков кәсіби спортшы ұл-қыздардың бұл қуаныштарын бірге бөлісті.
Айта кетерлігі, өңір басшысы Өмірзақ Естайұлының әрқашан да спорт саласы мамандарына, әсіресе спортшыларға деген қамқорлығы жоғары. Облыс әкімінің аймақтағы елдімекендерді аралау барысында, әсіресе шалғай ауылдарда жасалынып жатқан тіршіліктерімен танысу барысында жергілікті жердегі білім, мәдениет, денсаулық сақтау ошақтарымен қатар ауыл тұрғындарының дене шынықтыру мен спортқа бет бұруын әрқашанда басты назарда ұстап келеді.
«Тұран» спорт ойын түрлері клубы 2020 жылы ашылып жұмыс істей бастап, кәсіби тұрғыда жоғары санатты спортшылармен жасақталып, жоғары лига командалары арасында Түркістан облысының намысын қорғап келеді.
Түркістан облысы – волейбол спортының негізі қаланған өңір. Қазақ волейболының атасы саналатын Октябрь Жарылғаповтың өскен жері. Сондықтан да бұл жерде волейболдан талантты шеберлер шыңдалуда. Түркістан қаласының баскетболшы қыздары бұған дейін Қазақстан чемпионатында бас жүлдені жеңіп алған болатын. Түркістан –ХҚТУ командасын білікті бапкер Али Валиев көп жылдар жаттықтырып, әлемдік аренаға алып шықты.
Түркістан – спорт нысандары көбейіп келе жатқан әрі жігерлі жеңімпаздар мекені. Былтыр ғана Түркістан қаласында заман талабына сай «Olympic Center» спорт кешені ашылды. Мұнда спортты дамытуға барлық жағдай жасалған. Спорттың түр-түрімен жылдың 4 мезгілінде де үздіксіз айналысуға болады. Командалық ойын түрлері залы, 50 метрлік бассейні, медициналық орталығы өте жақсы жобамен салынған. Бұл кешен біздің жасөспірімдер, жастар үшін өте керемет сыйлық болды. Түркістандағы жаңа тұрғын үйлер аумағында орналасқан нысанның жалпы аумағы – 13 246 шаршы метр. Мұнда спорттың бірнеше түрінен халықаралық додаларды өткізуге мүмкіндік бар. 1000 адам сыятын әмбебап спорт залында шағын футбол, баскетбол, гандбол, волейбол, үстел теннисі және өзге де спорт түрлерін дамытуға мүмкіндік жасалған. 9 жүзу жолағы бар, ұзындығы 50 метрлік бассейн де халық игілігіне берілді. Ашық аспан астындағы бассейннің қасында бір мезгілде 200 адам күнге қыздырынып, жарысты тамашалай алады.
Сонымен бірге ерлерге және әйелдерге арналған жалпы 170 орындық киім ауыстыру бөлмесі, мәжіліс залы және сапалы әрі кәсіби құрал-жабдықтармен жабдықталған жаттығу залы жұмыс істейді. Жүгіру жолақтары мен веложол, массаж бөлмесі, хамам, сауна және 40 орындық буфет бар. Тағы бір ерекшелігі, кешенде медициналық орталығы да жұмыс істейтін болады. Сондай-ақ 82 орындық қонақ үй салынған. Бұл спорт кешенінде оқу-жаттығу жиындарын да өткізуге болады. Құрылыс жұмыстары 2019 жылы басталып, биыл тапсырылған бұл нысан Түркістан өңірінде бұқаралық және кәсіби спортты дамытуға тың серпін береді.
