Түркістан облысы бойынша жалпы ұзындығы 15 мың шақырымнан асатын 3000-ға жуық өзендер мен канал бар. Онда 176 қауіпті аймақ белгіленген. Жыл басынан бері өңірдегі су айдындарында 2 қайғылы жағдай орын алған. Бұл туралы облыстық төтенше жағдайлар департаментінің басқарма бастығы Қанат Қарабалаев брифингте мәлімдеді.
«24-қаңтарда Қазығұрт ауданындағы Рабат су қоймасында белгісіз себеппен суға батқан 70 жастағы азаматтың мәйіті табылған. Бүгінгі таңда оқыс оқиғаның себебін анықтау үшін сот медициналық сараптамасын тағайындады. Сонымен қатар, 2-ақпанда Жетісай ауданындағы К-30 каналында 1-сынып оқушысы көпірден құлап, қайтыс болған. Екі қазаны қосқанда бір айдан астам уақытта республика бойынша 5 адам су айдынында қаза тапқан»,- деді Қанат Мәлікайдарұлы.
Облыстық төтенше жағдайларды жою басқармасының бастығы Талғат Досалиевтің айтуынша, жыл басынан бері ауа райының күрт суытып, қарлы боранда қалып қойған 56 адам эвакуацияланған. Құтқару жұмыстарына 90-ға жуық адам мен 30 техника жұмылдырылған. Төтенше жағдайлар департаменті мамандары тұрғындарды жолға шығар алдында СМС хабарламаларын ескеруге шақырады.
