Түркістан қаласында тазалық сақтау жұмыстары қатаң қадағалануда.
Көктемгі санитарлық тазалық барысында жергілікті аумақтық полиция қызметкерлері мен 6 сектор мамандары күнделікті рейдтік аралау шараларын қолға алды.
Қазіргі таңға дейін жалпы, тазалық қағидасын сақтамаған 42 тұрғынға хаттама толтырылған. Атап айтқанда Отырар, Бекзат, Сауран, Шауғар тұрғын алабтарында 6 хаттамадан толтырылса, Бірлік тұрғын алабында тазалық қағидасын бұзу бойынша 8 дерек анықталды. Яссы тұрғын алабында 10 хаттама толтырылды.
Одан бөлек, «Менің таңдауым – таза қала!» эко-акциясы әр секторда жүйелі жүзеге асырылып келеді. Шара аясында Наурызым, Жаната, Жусандала, Көкшеқұм, Керейхан көшелері қоқыстан тазаланды. Оралман аумағы, Яссы тұрғын алабында О.Жарылқапов, Әл-Фараби, А.Юсупов, І.Қожабаев, көшелерінің тұрғындары эко-акцияға белсене қатысып, тазалық жұмыстарына жұмылды.
Сонымен қатар, мектептер мен ауруханаларда және орталық көшелерде сенбіліктер ұйымдастырылды.
Осы орайда, Қазақстан Республикасы Әкімшілік құқық бұзушылық туралы заңының 434-2-бабына сәйкес, ортақ пайдаланылатын орындарды, саябақтарды, скверлерді ластау, оның ішінде белгіленбеген орындарға коммуналдық қалдықтарды тастау – 5 АЕК мөлшерінде айыппұл белгіленгені тұрғындарға түсіндірілуде.
Сондай-ақ, Әкімшілік жаза қолданылғаннан кейін бір жыл ішінде осы әрекеттер қай жасалған жағдайда айыппұл мөлшері 10 АЕК-ке ұлғаятыны ескертілуде.
