Түркістан телеарнасында «жасанды интеллект» арнайы бағдарлама жүргізуде.
Күншуақ Табиғатқызы есімді «робот» қыз әзірге күн райының болжамы айдарын жүргізеді. Алғаш көрген адам сүйкімді келбеті мен мәнерлеп сөйлеу әдебіне қарап, «жасанды интеллект» екендігін білмей де қалады.
«Жалақы төлемейміз, ауырып қалмайды, дауысы, мәнері бұзылмайды, боянбайды. Қай жағынан алып қарасаңыз да тиімді. Біз ауа райы болжамының текстін алдын ала жазып береміз, содан «жасанды интеллект» жасайтын программаға аз ғана ақша төлейміз. Болды. Күншуақ Табиғатқызы эфирге шығып, бағдарламаны жоғары деңгейда алып шығады» – дейді телеарна директоры Жанахмет Ағыбаев.
Күн райын жүргізетін болғандықтан ұжым мүшелері робот қызды «Күншуақ» деп атаған. Ал, тегін «Табиғатқызы» деп алыпты.
Алдағы уақытта телеарна басшылығы «жасанды интеллект» жобасын екінші бағдарлама жүргізушісіне жасатып, сынап көрмек. Егер жоба сәтті шығып жатса, робот жүргізуші көрермендерді қызықты жаңалықтармен таныстырып отыратын болады.
Айта кетерлігі, Оңтүстік Кореяда жасанды интеллект арқылы жасалған тележүргізуші жаңалықтар бағдарламасын жүргізеді.
Тележүргізуші қыз Чеджудо аралының саясаты мен тыныс-тіршілігі туралы ақпаратты оқып береді. Оның мәтінін де дайындап беретін – жасанды интеллект. Жалақы сұрамайтын, ауырып қалмайтын, дауысы, мәнері бұзылмайтын, боянбайтын жүргізуші қай жағынан алып қарасаңыз да тиімді дейді мамандар. Бағдарламаға айына 600 000 вон жұмсалады екен. Бұл – шын жүргізушілер мен редакторлар командасын жалдағаннан әлдеқайда арзан.
Бүгінгі таңда елімізде де телестудиялық хабарларды жасанды интеллект жүргізетін жүйелер іске қосылды. Атап айтсақ, «Түркістан» телеарнасында Күншуақ Табиғатқызы есімді робот қыз күн райынан хабардар етеді. Тап солай «Қызылорда» телеарнасындағы ауа райын Айжан Сырқызы есімді жасанды жүргізуші баяндап отырады.
