Созақ ауданының әкімі Мұхит Тұрысбеков білім, спорт саласында жетістікке жеткен студенттер мен бапкерлерді қабылдап, ризашылығын білдірді. Өз саласының үздік мамандарын алғыс хатпен марапаттады.
Түркістан облыстық адами әлеуетті дамыту басқармасының ұйымдастыруымен «WORLDSKILLS TURKІSTAN – 2022» облыстық чемпионатында Созақ ауданынан №1 колледж студенті Колхоз Айгул Әскербекқызы тігінші мамандығы бойынша, Парманқұл Юсуп Шавкатұлы дәнекерлеу ісі мамандығы бойынша үздік кәсіп иесі атанды. Аталған чемпионат мақсаты техникалық және кәсіптік орта білім беру ұйымдарының білім беру процессіне оқыту сапасын арттыру, олардың әдістерін қолданысқа енгізу болатын. Чемпионаттың аясында студенттердің шығармашылық – инновациялық жобалары көрсетілді және студенттер жасаған ауыл шаруашылық техникаларынан көрме ұйымдастырылды. Облыстық чемпионатқа 38 колледжден 294 студент қатысты. Созақ ауданынан №1 колледжінің екі студенті жоғары көрсеткішке ие болды.
Сондай-ақ аудандық балалар мен жасөспірімдер спорт мектебінің бапкері «ҚР еңбек сіңірген қызметкері» атанған Жеңіс Алпысбайұлы мен Қазақстан Республикасының мәдениет және спорт министрлігінің спорт және дене шынықтыру істері комитетінің алғыс хатын алған, «ҚР еңбек сіңірген жаттықтырушы» Созақбай Мұратбайұлына ілтипат көрсетіп, марапаттады.
– Сіздердің жетістіктеріңіз ауданның абыройы. Өз салаларыңызды үздік болып, жоғары марапат алып жатырсыздар. Біз қашанда қуанып, қолдау көрсетеміз,- деді аудан басшысы Мұхит Тұрысбеков.
