ТҮРКІСТАН: ЖАҢАҚҰРЫЛЫС АУМАҒЫ АУЫЗ СУМЕН ҚАМТЫЛДЫ

346
“Су – тіршілік көзі” дегендей, елді мекенде тіршілік жасау үшін ең алдымен су қажет. Халық санының артуына байланысты жаңа аумақтар құрылып, көшелер пайда бола бастады. Жаңа аумаққа қоныстанушылардың бірінші кезекте сұрайтын мәселесінің бірі – ауыз су.
Ауылдың тыныс-тіршілігін зерделеп, ауыз сумен қамту мақсатында Сайрам ауданының әкімі Уласбек Садибеков жиі аралап, тиісті басшыларға тапсырмалар жүктеді.
Ауыз су құрылысының сапасына, нысанның мерзімінде тапсырылуын жіті бақылады.
Қарасу ауыл округіне қарасты Ақбай ауылының Жаңақұрылыс көшесіндегі 17,0 гектар аумақтың тұрғындары ауыз су жүйесімен қамтылды.
Аталған құрылыс нысанына жалпы ұзындығы 2533,4 метр көлеміндегі су құбырлары тартылды. Сумен жабдықтау жүйесінің өнімділігі сағатына 17,26 текше метрді құрайды. Құрылысын жүргізген мердігер «Корпорация «Силур» ЖШС-і. Жобалаушы мекеме «А Строй Проект». Құрылысы 2020 жылы басталып, жыл аяғында қабылдау актісімен тапсырылған. Ауылдың 142 учаскесіндегі жаңа көшелер ауыз су жүйесіне қосылған.
Аудан әкімі көше тұрғындарымен кездесіп, бүгінгі жағдайымен танысып қайтты. Өз кезегінде тұрғындар басшыларға ризашылықтарын жеткізді.