Бүгін Сарыағаш ауданының әкімі Мұхит Отаршиев Азия чемпионын және Түркия елінде өткен Халықаралық жарыстан жүлдемен оралған жас спортшыларды арнайы қабылдап, жеңістерімен құттықтады.

– Спорт – денсаулық кепілі десек, спорттағы жетістіктер – ел мерейін өсіретін жүлделер тынымсыз еңбектің жемісі. Мұндай жеңістер қажырлы күшпен келеді. Осы мүддеден шығып жүрген аудан спортшылары биік белестерді бағындыруда. Олардың қатарында жастардың жеңіске деген жігерін ерекше атап өтуге болады. Азия чемпионатында және Халықаралық жарыста намысты қолдан бермей, аудан мерейін үстем еткендеріңіз үшін алғыс білдіремін. Алдағы уақытта да додаларда топ жарып, жеңіс тұғырынан көріне береді деп сенемін. Жеңістеріңіз құтты болсын! – деген аудан басшысы жас спортшыларға ақ жарма тілегін білдіріп, арнайы «Алғыс хат» және бағалы сыйлықтармен марапаттады.

Сонымен қатар, аудан басшысы жас спортшыларды жаттықтырып жүрген №2 балалар-жасөспірімдер спорт мектебінің директорына және бапкерлеріне де ризашылығын білдірді.

Кездесуде жас спортшылар спорттағы жетістіктерін айтып, бұдан да жоғарғы белестерді бағындыруға ниетті екендіктерін жеткізді. Ал жастарды жарысқа дайындаған бапкерлер Әкімбай Ерболат, Бағдат Бақытбеков және Олжабай Бейсенбаев спорт мектебіндегі спорт түрлерін дамыту үшін атқарылып жатқан жұмыстарға тоқталды.

Айта кетсек, аудан тұрғыны Әлия Әлайдар ағымдағы жылдың шілде айының 01-03 күндер аралығында Қырғызстан мемлекетінде каратэ SHOTOKAN-нан 10-11 жас аралығында жасөспірімдер арасында өткен, Азия чемпионатында қарсылас шақ келтірмей каратэ-доның Шобу иппон түрінен Азия чемпионы атанды.

Сонымен қатар, Түркия елінде Хуссейн Озканұлының құрметіне өткен Халықаралық турнирде дзюдо спорт түрінен ауданның жас спортшылары 1 алтын, 1 күміс, 7 қола жүлдемен оралды.

Атап айтсақ, Ерасыл Жиентай чемпион атанып алтын жүлдеге, Айша Ташкенбай күміс жүлдеге, ал Али Тухтарбай, Еркебулан Насиров, Айша Алжаппар, Асхат Асқар, Дармен Есенгелді, Нурбала Зайнил, Нұржас Зайнил қола жүлделерге ие болды.