Түркістанда ақын, әнші-сазгер Ақан серінің 180 жылдығына орай «Жас толқын – 2023» дәстүрлі аймақтық эстрада әншілері мен мәдени іс-шара жүргізушілер байқауы өтті. Байқау шымылдығы Түркістан халық театры сахналаған «Ақан сері мен сұлу» қойылымымен ашылып, қатысушыларға жігер сыйлады.
Биылғы аймақтық байқауға аудан-қалалардан әншілер бағытында 14-21 жас аралығындағы 15 үміткер өтініш білдіріп, 12-сі жолдама алса, мәдени іс-шара жүргізушілері бағыты бойынша 17 үміткер өтініш білдіріп, 12 үміткер қатысты. Байқау ережесіне сай әншілер жеке, топ болып, яғни дуэт, трио, квартет болып жанды дауыста 2 ән (патриоттық және Түркістан) орындады. Ал мәдени іс-шара жүргізушілері көркем шығармадан, драмадан үзінді немесе танымал ақынның өлеңін мәнерлеп жатқа оқып, екінші кезеңде кез келген тақырыпта мәдени іс-шараны дайындап жүргізді.
Мәдени сайыста ХҚТУ-нің «Вокалдық өнер» мамандығының аға оқытушысы, ҚР-ның Мәдениет қайраткері, Шымкент қалалық Опера және Балет театрының салисті Оразкуль Даулетова, Р.Сейтметов атындағы музыкалық сазды драма театрының белді актрисасы, 2006 жылы Айша Абдуллина атындағы үздік актриса номинациясының иегері, 2011 жылы ҚР-ның «Серпер» жастар сыйлығының иегері, 2014 жылы мәдениет министрлігінің алғыс хатымен марапатталған, 2020 жылы Тұңғышбай Жаманқұлов атындағы үздіктердің үздігі Гульзада Айтбаева, Облыстық мәдениет және халық шығармашылығы орталығының «Ұлттық шығармашылық және жанр жөніндегі» маманы, Әнші, Халықаралық, Республикалық, Облыстық, байқаулардың лауреаты Ахат Жеткербаев сынды өнер иелері қазылық етіп, әділ бағасын берді.
Өнер додасы барысында «Жас толқын – 2022» байқауының I орын иегері Әлімхан Пернебаев Оралхан Бөкейдің «Атау кере» шығармасынан үзінді ретінде «Тағаның монологын» оқыды. Содан соң «Жас толқын – 2022» эстрадалық әншілер байқауының бас жүлдегері Сүлейменова Жасмин Нұрболатқызы мен «Семсер» тобы «Жас толқын» гимнін орындады.
Қазылар алқасының шешімімен «Жас толқын – 2023» аймақтық эстрадалық әншілер байқауының бас жүлдесін Ордабасы ауданынан Өскенбек Елнұр иемденді. Түркістан қаласынан Салқынбек Мейрамбек І орын иегері, Төлеби ауданынан Жарылқасынұлы Әсет мен Бәйдібек ауданынан Төлбасы Аяужан ІІ орын иегері, Түркістан қаласынан Жайырбек Сабыр мен Арыс қаласынан Нұрлыбек Рамазан ІІІ орын иегері атанды. Ал «Түркістан жаңғырығы» номинациясы Созақ ауданынан Нұрша Талшынға және Роза Бағланова атындағы номинация Есімхан Самалға бұйырды.
«Жас толқын – 2023» аймақтық мәдени іс-шара жүргізушілер байқауының бас жүлдесін Төлеби ауданынан Көлбай Абылайхан иемденді. Түркістан қаласынан Өтеген Нұрдәулет І орын иегері, Кентау қаласынан Бертай Артықбай мен Түркістан қаласынан Әшім Шолпан ІІ орын иегері, Түркістан қаласынан Өмірбай Абылайхан мен Мақтаарал ауданынан Дәрібай Балауса ІІІ орын иегері атанды. Ал «Түркістан келбеті» номинациясы Арыс қаласынан Басқараева Алуаға бұйырды. Сонымен қатар барлық қатысушыға қатысқаны үшін арнайы диплом мен жеңімпаздарға бағалы сыйлықтар табысталды.
Шара соңында Түркістан қалалық мәдениет үйінің директоры Шәмет Лиза Төлегенқызы жас таланттар мен дарындарды табу мақсатындағы дәстүрлі аймақтық эстрада әншілері мен мәдени іс-шара жүргізушілері байқауы 2009 жылдан бері өтіп келе жатқандығын тілге тиек етіп, келген өнерпаздарға алғыс айта отырып, жарқын болашақ пен өнер жолында шығармашылық табыс тіледі.
Жас таланттар мен дарындарды табу мақсатында 2009 жылдан бері Түркістан қалалық мәдениет үйінің директоры Шәмет Лиза Төлегенқызының басқаруымен дәстүрлі өткізіп келе жатқан «Жас толқын» эстрадалық әншілер мен мәдени іс-шаралар жүргізушілерінің байқауы елдегі, облыс, қаладағы жаңалықтар мен өзгерістерге, руханияттылықты насихаттай беру аясында ұйымдастырылып келеді. Қазақстан Тәуелсіздігіне, мерейлі жылдар, мерейтойлар, «Түркістан – түркі әлемінің мәдени астанасы» «Болашаққа бағдар: Рухани жаңғыру», Ұлы даланың жеті қыры», «Нұрлы жол», «Ел Ордасы – Астанасына», «Түркістан – облыс орталығы» болуы сияқты айтулы оқиғаларды басты назарға алынып өткізілуде. Орындайтын шығармалары Патриоттық ән мен Түркістан туралы ән орындау шартты болып өзгермейтін етіп белгіленген. 2021 жылы Ел Тәуелсіздігіне 30 жыл КСРО –ның халық әртісі, Ермек Серкебаевтың 95 жылдығына арналып «Жас толқын» байқауы онлайн форматта өткізілген болатын.
Сонымен қатар, 2022 жылы «Жас толқын-2022» әншілер мен мәдени іс – шаралар жүргізушілер байқауы «Қазақстан Республикасы мемлекеттік рәміздерінің 30 жылдығы, «Түркістан –Түркі елдерінің мәдени астанасы» атануына, композитор Ғазиза Жұбанованың 95 жылдығына арналды. Жастарымызды отансүйгіштікке баулу, ұлттық рухта тәрбиелеу, өнерді дамыту, жас таланттарды тауып, қолдау көрсету, Жаңа Қазақстан: Жаңару мен Жаңғыру жолы аясында ақын, әнші, композитор Ақан серінің 180 жылдығына орай «Жас толқын-2023» байқауы ұйымдастырылған.
