Биыл халықты жұмыспен қамту мәселесі – елді индустрияландыру, экономиканы диверсификациялау және кәсіпкерлікті дамыту бағдарламаларымен ұштастырылып отыр.
Мемлекет басшысы жыл сайын 10 мың тұрғынға 100 тұрақты жұмыс орнын ашу міндетін жүктеді. Әр ауданның экономикалық жағдайы тағы да зерделеніп, инвестиция тарту, жұмыс орындарын ашуға басымдық берілгені жөн.
Қазақстан Республикасы Үкіметінің 2022 жылғы 14 сәуірдегі №218 қаулысымен Халықтың табысын арттырудың 2025 жылға дейінгі бағдарламасы бекітілгені мәлім. Осындай стратегиялық маңыздағы құжаттарды орындау мақсатында тиісті кезеңдерге арналған іс-шаралар да жүргізілуде. Соның бірі – жұмыспен қамтудың өңірлік картасына енгізілген, Ұлттық жобалардың шеңберінде жүзеге асырылатын инфрақұрылымдық жобаларды жүзеге асыруда жергілікті тұрғындарды жұмыспен қамту мәселесі.
Облыс әкімінің орынбасары Ұ.Тәжібаевтың төрағалығымен 02.06.2022 жылы өткен мәжілістің “Жобаларды іске асыратын мердігер жұмыс берушілермен түзілетін мемлекеттік сатып алу келісім-шартына жұмыс орындарын ашу жоспарын енгізу”, облыс әкімі Ө.Шөкеевтің 06.06.2022 жылы төрағалығымен өткен мәжілістегі “Жұмыс беруші мердігерлердегі немесе кәсіпорындардағы бос жұмыс орындары туралы мәліметтерді “Электронды еңбек биржасының” ақпараттық жүйесіне енгізу бойынша түсіндіру жұмыстарын жүргізу”, “Жобаларды іске асыратын мердігерлермен түзілетін мемлекеттік сатып алу келісім-шартына міндетті зейнетақы жарнасының төленуі және электронды еңбек келісім-шартын түзу бойынша талаптардың енгізілуін қарастыру” туралы хаттамалық тапсырмаларын орындау мақсатында Мақтаарал ауданы әкімдігінің халықты жұмыспен қамту орталығы мамандары тарапынан тиісті жұмыстар жүргізілуде.
Жалпы 2022 жылы Өңірлік карта аясында облыста 34 мыңға жуық жұмыс орнын ашу көзделген. Оның 5 мыңнан астамы тұрақты жұмыс болады деп жоспарланған. Бүгінгі таңда 9 мыңға жуық адам жұмыспен қамтылған. Оның ішінде Созақ, Төлеби және Шардара аудандарында 300-дей тұрақты жұмыс орындары ашылған. Өңірде тұрақты жұмыс орындарын ашуға басымдық берілмек.
Айта кетсек, биылғы жылы Түркістан облысында жастарды жұмыспен қамту жоспарына сәйкес 29 307 жасты жұмыспен қамту көзделуде. Олардың басым көпшілігі Жастар практикасы және Қоғамдық жұмыс жобаларының аясында жүзеге аспақ. Ал, жыл басынан бері өңірдегі 6 161 жас тұрақты жұмысқа орналастырылған.
