ТҮРКІСТАН: ЖОМАРТ ЖАНДАР МҰҚТАЖ ЖАНҒА ҮЙ СЫЙЛАДЫ

341

Созақ ауданында «Central Asia Mining Со» ЖШС, Қарақұр ауыл округі, Раң ата елді мекенінің тұрғыны Шайнеков Қарабекке үй сыйлады. ҚМДБ «Зекет және қайырымдылық» қорының «Ел үлесі – пәтерге» акциясы аясында 561-баспана табысталды. Елді мекен тұрғыны Шайнеков Қарабекке үй беру мәселесіне ауыл имамы Сұлтанбек Шайменов ұйытқы болды.

Үй табыстау рәсіміне аудан әкімі Мұхит Тұрысбеков арнайы қатысып, құттықтау сөз сөйледі.

-Қазіргі таңда жомарт жандар мұқтаж отбасыларға үй сыйлап, жақсы үрдісті қалыптастырды. Бүгін осындай қуанышты сәттің куәсі болып отырмыз. «Central Asia Mining Со» компаниясы тұрғындар бастамасын қолдап, игі істі жалғастырды. Өзгеде компанияларға үлгі болатынына сенеміз. Үйдің іші қуанышқа толы болсын,-деген тілегін жеткізген аудан басшысы қоныс тойына арнап, сый-сияпатын берді.

Сондай-ақ ауданның бас имамы Мейрамбек Әбдіқұлов, ауыл имамы Сұлтанбек Шайменов жылы лебізін білдіріп, алғыстарын жеткізді. Ауыл ақсақалы Тілеубек Ибраймов батасын берді. «Central Asia Mining Со» ЖШС атқарушы директоры Рахымжан Сейтжанов, үйдің кілтін салтанатты түрде табыс етті.

«Central Asia Mining Со» ЖШС Қарақұр ауыл округіне бизнестің әлеуметтік жауапкершілігі аясында тұрақты түрде демеушілік жасап келеді.