Түркістан қаласында 2022 жылдың маусым айына дейін 2172 отбасы атаулы әлеуметтік көмек алды. Оның ішінде жәрдемақы шартты түрде – 1584, шартсыз түрде – 588 отбасыға тағайындалды. Ал, 1-6 жас аралығындағы балаларға арналған кепілдендірілген әлеуметтік топтаманы – 3221 бала иеленді.

Әлеуметтік бағдарламалар бөлімінде көмектің 9 түрі көрсетіледі. Ерекше қажеттілігі бар тұрғындар сурдотехникалық, тифло техникалық, міндетті гигиеналық құралдармен қамтылады. Одан бөлек, протез-ортопедиялық көмектер көрсетілді.

Жыл басынан бері ерекше қажеттілігі бар 632 тұрғын шипажайда ем алса, 361 азаматқа жеке әлеуметтік көмекші, 83 адамға ымдау тілі маманы қызметтері көрсетілді. Сонымен қатар, бөлімде 2 өз- өзіне қызмет көрсету бұрышы бар.

Ерекше қажеттілігі бар азаматтар үшін 7 инватакси, 2 әлеуметтік такси қызметі іске қосылған. Көрсеткіштер бойынша, инватакси қызметін 143 ерекше қажеттілігі бар тұрғын алса, әлеуметтік такси қызметіне 8 азамат жүгінген.

Мемлекет басшысы Қасым-Жомарт Тоқаев 2022 жылды «Балалар жылы» деп жариялады. Осыған байланысты Түркістан облысы әкімдігінің кешенді жоспары бекітілген. Оның 3-бөлімінде балалардың және мүмкіндіктері шектеулі балалардың денсаулығын нығайту мен қорғау шараларын іске асыру жоспарланған. Балалардың денсаулығын жақсарту, мақсатында Түркістан облысының қоғамдық денсаулық басқармасы балаларға арналған оңалту төсек орындарын көбейтуде. Қазіргі таңда 613 оңалту төсек-орны бар, соның ішінде балаларға арналған үш оңалту орталығы, бір шипажай мен екі «Қамқорлық» орталығы қызмет атқарып жатыр.

Айта кетсек, өткен маусым айында Түркістанда «Қамқорлық» оңалту орталығы ашылған болатын. Жаңа технологиямен жабдықталған «Қамқорлық» балалар оңалту орталығы жүйке жүйесі мен тірек-қимыл аппаратының бұзылыстары бар науқас балаларды қабылдап, ем-дом көрсетеді. Орталық заманауи үлгіде жасақталған әрі бұл өңірде жоқ құрал-жабдықтармен қамтылған. Бұл оңалту орталығы балалардың денсаулығын жақсартуға оң ықпалын тигізері анық. Оңалту орталығының төсек-орын саны 50 күндізгі және 10 тәуліктік болып жабдықталған. Орталықта тұз шахтасы, шунгит бөлмесі, эрготерапия, сенсорлық бөлме, механотерапия, бальнеотерпаия, интерактивті бөлме, емдік дене шынықтыру, ойын бөлмелері бар. Қазіргі таңда мұнда 1-14 жас аралығындағы жүйке жүйесі мен тірек-қимыл аппаратының бұзылыстары бар науқас балаларға көмек көрсетіліп жатыр.