Келес ауданында ұлттық өнерді ұлықтаған тағылымды рухани кеш – айтыскер ақын Жарқынбек Наушабековті еске алуға арналған «Жыр жүйрігі Жарқынбек» атты республикалық ақындар айтысы жоғары деңгейде өтті.
Айтыстың ашылу салтанатында аудан әкімі Жәнібек Ағыбаев құттықтау сөз сөйлеп, Жарқынбек Наушабековтің қазақ айтыс өнеріндегі орнына ерекше тоқталды. Өз сөзінде айтыстың ұлт руханиятындағы маңызын атап өтіп, бұл өнердің елдің мұңын мұңдап, жоғын жоқтайтын қасиетті мұра екенін жеткізді.
Сонымен қатар, бүгінгі дода жас ақындарға үлкен мектеп болып, Жарқынбектің жолын жалғастыратын жаңа буынның қалыптасуына серпін беретінін атап өтті.
Айтысқа еліміздің әр өңірінен келген белгілі және жас ақындар қатысып, өзара бақ сынады. Атап айтқанда, сахна төрінде Ахметрасул Баянбай, Айбек Қалиев, Бекарыс Шойбеков, Дәурен Ысқақ, Дінмұхаммед Жарқынбекұлы, Нұрдаулет Өмірбек, Аян Ниязбек, Дидар Қами, Хазірет Бердіхан, Талғат Мықи өнер көрсетті. Әрбір ақын өзіне тән стильмен, ұтқыр ойымен, өткір тілімен көрермен ықыласына бөленді. Жыр додасы барысында ақындар ел ішіндегі өзекті мәселелерді көтеріп, қоғамдағы түрлі тақырыптарды тереңінен қозғады. Айтыс тартысты өтіп, көрермендерге ерекше әсер сыйлады.
Қорытындысында Бас жүлдені Ахметрасул Баянбай иеленсе, І орынды Айбек Қалиев жеңіп алды. ІІ орын Бекарыс Шойбековке бұйырды. Ал ІІІ орынды Дәурен Ысқақ пен Дінмұхаммед Жарқынбекұлы өзара бөлісті. Сонымен қатар Нұрдаулет Өмірбек, Аян Ниязбек, Дидар Қами, Хазірет Бердіхан және Талғат Мықи арнайы жүлделермен марапатталды.
Айтысты тәжірибелі әділқазылар алқасы – Бекмұрат Анарбаев, Бөрібай Оразымбет, Анар Жаппарқұлова және Нұрғали Әнапия бағалады. Ал кештің жоғары деңгейде өтуіне ақын, жүргізуші Тұрар Тлеулиев ерекше үлес қосты.
