Бүгін Түркістан төріндегі Облыстық “Фараб” ғылыми-әмбебап кітапханасында Р.Сейтметов атындағы Түркістан сазды-драма театры ХХІІ маусымын қорытындылады. Салтанатты кеште Б. Есеналиевтің “Ана жүрегі” драмасы сахналанды. Қойылымды Түркістан облыстық мәдениет басқармасы басшысының орынбасары Әділ Қонысбеков, ҚР Мәдениет қайраткері Ұлжан Мұстафаева бастаған бір топ зиялы қауым өкілдері мен қала жұртшылығы тамашалады.
Румынияның Тырговиште қаласында өткен Халықаралық “BABEL F.A.S.T” фестивалінде Қазақстан атынан қатысып, шет елдегі өнерсүйер қауымның ерекше ықыласына ие болған театр ұжымын Ұлжан Әбенқызы арнайы құттықтап, қара шаңырақтың ашылу тарихы мен оның маңыздылығына тоқталды. Сондай-ақ бүгін сахналанған туындыдағы ананың сағынышын, перзенті үшін бәріне дайын екендігін, егемен елдің қадірін білу керектігін тілге тиек етті.
– Түркістан қаласының рухани жауһарына айналған осы театр ұжымы20 жылдан астам уақытта тарихи шаһардың мәдени өміріне оң өзгерістер алып келуде.Ұлттың ұлы перзенті Ғ. Мүсірепов “Театр – хас сұлудың көз жасындай мөлдір өнер” деп театр саласы мамандарына артылар жүктің шамасын анықтап бергендей. Сіздер сол бағаға лайықты, өз көрерменін қалыптастырған, өнерге деген адалдықтан танбаған кәсіби ұжым ретінде өңір жұртына ерекше әсер сыйлап келесіздер, – деді құттықтау сөз алған Әділ Нұржанұлы.
Ал театр басшысы Ержан Исатаев: “Театр ғимараты күрделі жөндеуге жабылған соң, бүгін облыстық кітапхана сахнасында өнер көрсетіп отырмыз. Театр ұжымы күз айларында өздеріңізбен қайта қауышып, жаңа туындылармен қуантатын болады” – деп, келген көрермен қауымға шынайы алғысын білдірді. Кеш соңында еңбегі еленген театр әртістеріне арнайы марапат пен облыс әкімінің ықылас гүлі табысталды.
