Түркістан қаласындағы робототехника үйірмесіне қатысушылар инженерлік дағдыларды игеріп келеді. Бұл Хабтың ашылу күнінде Түркістан өңірінің физика пәні мұғалімдері атмосфераның жоғарғы қабаттарына шар-зондтардың ұшу технологиясы бойынша практикалық мастер-класынан өткен болатын. Олар шар-зондтардың ұшу траекториясын және оның қону орнын алдын-ала есептеуді үйренді.
Үйірме жетекшісі Ақтаев Еркіннің айтуынша «Спутниктік робототехника және байланыс» үйірмесі оқушылардың білімін STEM білім беру жүйесі арқылы дамытуға басымдық берілген екен.
– «Оқушылар сарайындағы» UniSat білім беру Hub-ының мүмкіндігі мол. Соның бір дәлелі – өткен жылдың қазан айында атмосфераның жоғарғы қабатына зонд-шар арқылы CubSat типтегі наноспутниктің ұшырылуы. Бұл – жалпы біздің еліміздегі мектеп оқушыларының қатысуымен өткен елеулі іс-шара деп айтуға болады. Өйткені, сол ұшырылған наноспутниктен алынған мәліметтерді талдау барысында оқушылардың спутникпен байланыс жасауға деген қызғушылықтары артқаны байқалды, – дейді Ақтаев Еркін.
Спутниктік робот техникасы үйірмесіндегі оқушылар бір жыл ішінде айтарлықтай жетістіктерге қол жеткізіпті. Үйірме жұмысымен танысу барысында ғарыштық технологияларды игеруге құмартып жүрген оқушылармен де тілдестік. Олардың айтуынша, бұл үйірмеге қатысатын балалар теория арқылы нанотехнологияда микросұлбаларды құрастыруды үйренеді. Содан кейін, арнайы компьютерлік бағдарламалар арқылы барлық қажетті ақпаратты енгізе алады. Ең бастысы қызығушылықты жоғалтпай, сабырлылық таныту, – дейді үйірме қатысушылары.
Айта кетейік, Хаб жұмысы бірінші кезекте түркістандық мектеп оқушылары арасында ғылым, технология, инженерлік-математика (STEM) саласындағы білім мен мансапты танымал етуге бағытталады. Болашақ ғалымдар енді қазан айында жұлдызды аспанды зерттеуге көмектесетін тағы бір наноспутникті әуеге ұшыруды жоспарлап отыр.
ЮНИСЕФ, ҚазҰУ және Оқушылар сарайы ынтымақтастығы арқасында Түркістан облысының балалары STEM курстарына қатысып, инженерлік дағдыларды игеретін болады.
