Түркістан гарнизонында 1 қазан – Халықаралық қарттар күніне орай әскери қызметшілердің Ауған соғысының ардагері Сапарбек Жандарбекұлы Пазылбековпен кездесу өтті.
Түркістан гарнизонының бастығы – 99210 әскери бөлімінің командирі полковник Талғат Аязханұлы Мажимбеков әскери қызметшілермен және Ауған соғысының ардагерлерімен бірге Сапарбек Пазылбековті мерекемен құттықтап, оның Отан алдындағы еңбегіне құрмет білдірді.
Кездесу аясында әскери қызметшілер ардагерге практикалық көмек көрсетіп, үйінің ауласы мен оған іргелес аумақты тазалау жұмыстарын жүргізді. Бұл бастама аға буын өкілдеріне деген құрмет пен қамқорлықтың көрінісі болды. 
Кездесу барысында ұрпақтар сабақтастығын сақтау, ардагерлердің өмірлік тәжірибесін жас ұрпаққа үлгі ету және әскери-патриоттық тәрбиені нығайту мәселелеріне де назар аударылды. Әскери қызметшілер ардагерлердің өнегелі өмір жолы мен жауынгерлік тәжірибесі кейінгі буын үшін маңызды екенін атап өтті.
Өз кезегінде Сапарбек Пазылбеков көрсетілген құрмет пен қамқорлық үшін алғысын білдіріп, әскери қызметшілерге зор денсаулық, қызметте табыс, отбасыларына амандық және елімізге тыныштық тіледі.
Ардагерлерге қолдау көрсету және аға буынға қамқорлық таныту – әскери-патриоттық жұмыстың маңызды бағыттарының бірі. Мұндай кездесулер ұрпақтар арасындағы байланысты нығайтып, Отанға қызмет ету дәстүрлерін сақтауға ықпал етеді.
