“Керуен сарай” туристік кешенінде 10-12 маусым күндері Бәйдібек ауданының мәдени күндері өтті.
“Түркістан – түркі әлемінің жүрегі” атты концерттік бағдарламаның алғашқы күні Ш.Мұртазаның «Домалақ ана» қойылымымен (үзінді) басталып, әрі қарай аудан өнерпаздарының фольклорлық концертіне ұласты. Ал екінші күнінде эстрадалық ән шырқалып, «Балауса» цирк өнерпаздары қала тұрғындары мен қонақтарын ерекше өнерімен тәнті етті. Мәдени шараның соңғы күнінде аудандық мәдениет үйінің концертімен қорытындыланды.
Еске сала кетейік, “Түркістан – түркі әлемінің жүрегі” атты облысқа қарасты аудан-қалалардың мәдени күндері «Керуен сарай» туристік кешеніне келушілерге арнап концерттік бағдарлама мен мерекелік іс-шаралар ұйымдастыру, Түркістанның туристік әлеуетін нығайту мақсатында өткізіліп келеді. Бұған дейін онға жуық аудан-қала өнерпаздары өнер көрсетті. Ал осы апта соңында Сауран ауданының өнерпаздарының мәдени күндері өтетін болады.
