Түркістан облысының БАҚ өкілдері арасында өткен спартакиада өз мәресіне жетті. Сайыстар спорттың 7 түрінен өтті. 27 мамыр күні қазақ күресі, бильярд, үстел теннисі және шахматтан мықтылар анықталса, 17-18 маусым күндері шағын футбол, волейбол және арқан тарту додалары қорытындыланды. Спорттық бәсеке ҚР Мемлекеттік Рәміздеріне 30 жыл толуына және 28 маусым – Бұқаралық ақпарат қызметкерлері күніне орай ұйымдастырылды.
Тартысқа толы спартакиадаға жалпы 10 команда қатысты. Нәтижесінде жалпы есепте “Turkistan Media Holding” ұжымы 1-орынды қанжығаласа, “Рейтинг-Собкор” командасы кестенің 2-сатысына жайғасты. Ал, “Оңтүстік Қазақстан” газетінің командасы жалпы есептегі 3-орынды иеленді.
– Биыл БАҚ өкілдері арасында Түркістан облысындағы дәстүрлі спартакиада мәреге жетті. Бұл бәсекеге аудан, қалалық газеттер бұған дейін жекелей қатысып келген. Осы жолы бірігіп «Тұран БАҚ» командасы болып сапқа қосылдық. Түркістан, Отырар, Түлкібас, Кентау, Бәйдібек, Ордабасы аудан, қалалық газеттерінің редакцияларынан жастар бірігіп, үлкен күш құралды. Сөйтіп командалық есепте төртінші орыннан көріндік. Бірақ медаль саны бойынша сынға түскен командалар арасында «Тұран БАҚ» топ бастап тұр. Еншімізде тоғыз медаль бар. Алтын кем. Сол үшін кейін қалдық. Келесі жылы «Тұран БАҚ» алғашқы үштіктен орын алады деген сенімдеміз. «Тұран БАҚ» командасы үшін достық жеңді, – дейді қалалық «Түркістан» газетінің бас редакторы Мәлік Дәулетов.
Ал “Оңтүстік Қазақстан” газетінің тілшісі Бауыржан Ерман биылғы БАҚ өкілдері арасындағы облыстық спартакиада жоғары деңгейде өткенін айтады.
– Жарысты ұйымдастырушыларға алғысымыз шексіз. Футболдан сайыс өтіп, “Оңтүстік Қазақстан” газетінің командасы топ жардық. Топтық турнирде алдымен “Нар тв” командасын 6-1, сосын “Уақыт” газетінің құрамасын 5-0 есебімен ұтып, топтан бірінші орынмен шықтық.
Жартылай финалда тартысты бәсеке де, әдемі голдар да болды. Ақтық сынға берілер жолдаманы “Рейтинг-Собкор” командасымен сарапқа салдық. Қорытынды есеп: 7-3 болды.
Ал ақтық сында аймақтардағы әріптестерден құралған “Тұран-БАҚ” командасын 3:1 есебімен ұттық. Спорттық шаралар дами берсін, салауатты өмір салтын ұстанайық, – дейді ол.
Түркістан облысы әкімі баспасөз қызметінің маманы, белгілі журналист Ғабит Сапарбеков жылдан-жылға спартакиадаға қатысушылар көбейіп келе жатқанын жеткізді.
– Спорт – көңіл күйді көтеріп, өз-өзіңізді көңілді сезінуге көмектеседі. Биыл спартакиадаға “Баспасөз хатшылары” командасы да қатысты. Бірнеше ауданнан, өңірлік коммуникация және Түркістан облысы әкімдігінің баспасөз хатшыларынан құралған команданың әрбір мүшесін барлық журналистер танып, жанкүйер болды. Бұның өзі көп нәрсені аңғартады. Саламатты өмір салтын насихаттап, әріптестерді көріп, бір қуанып қалдық, – дейдіҒ. Сапарбеков.
Хабар24 телеарнасының облыстағы меншікті тілшісі Жандос Жұмабеков биылғы спартакиадаға белсене қатысты.
– Тамаша, тартысты ойын болды. Командалардың жақсы дайындықпен келгенін ойын өрнегінен де көруге болады. Ұйымшылдықпен, айқай-шусыз әдемі өтті. «Шынықсаң – шымыр боласың» демекші, дене жаттығуы адам баласына қашан да пайдалы. Күні бойы өзіңді сергек сезініп жүрудің де бір тәсілі – спорт. Спорттың адам өміріне көп пайдасы тиетіні сөзсіз. Сондықтан да адам баласы спортты жанына серік қылу керек.Спортпен айналысып, салауатты өмір салтын ұстанайық, достар!, – деді ол.
Еске сала кетейік, өнерімен көпті тәнті еткен жеңімпаздарға ақпарат саласында еңбегі сіңген, өмірден өткен азаматтар атындағы арнаулы номинациялар табысталды.
Үздіктер Қарағанды қаласында өтетін БАҚ қызметкерлері арасындағы республикалық спартакиадаға берілетін жолдамаға ие болды.
