ТҮРКІСТАНДА БАҚ ӨКІЛДЕРІ ЭТНОСАРАЛЫҚ ТАТУЛЫҚТЫ САҚТАУ ЖАЙЫН ТАЛҚЫЛАДЫ

13

Түркістан өңірінде облыстық қоғамдық даму басқармасы «Қоғамдық келісім» КММ-нің ұйымдастыруымен Этносаралық қатынастар саласындағы медиасауаттылықты арттыру тақырыбында семинар-тренинг өтті.

Іс-шараның негізгі мақсаты – қоғамдық келісімді нығайту жұмыстарын БАҚ-та жандандыру, жалған ақпараттың таралуына қарсы заң аясында ақпараттық-түсіндіру жұмыстарын күшейту және өзекті мәселелерді, ұсыныстарды талқылау, ақпараттық жұмыстарды жетілдіру.

Келелі жиынға Түркістан облысы қоғамдық даму басқармасының басшылығы, Түркістан облыстық Қазақстан халқы Ассамблеясы жанындағы Журналистер мен блогерлер клубының мүшелері, аудандық, қалалық газеттердің бас редакторлары қатысты. Семинарды Түркістан облыстық ҚХА жанындағы Журналистер мен блогерлер клубының төрағасы Ерсұлтан Әмірбек жүргізіп отырды.

Семинар-тренингте сөз алған Түркістан облысы қоғамдық даму басқармасының ҚХА хатшылығы және этносаралық қатынастарды дамыту бөлімінің бас маманы Тимур Оралбеков қоғамдық келісімді нығайту бағытында өңірдегі атқарылып жатқан жұмыстарға тоқталып, ел тұрақтылығын сақтауда ақпараттық қауіпсіздіктің маңызды екенін атап өтті.

– Мемлекет басшысы Қасым-Жомарт Кемелұлы Тоқаев сәуір айында өткен Қазақстан халқы Ассамблеясының «Ел бірлігі – жаңарған Қазақстанның тірегі» атты 31-сессиясында Қазақстанның дамуына өзге этностардың қосып жатқан үлесі туралы мемлекеттік тілде айту өте маңызды екенін және осы бағытта жұмыс істейтін БАҚ-қа қолдау көрсетілетінін баса айтқан болатын. Қазіргідей жылдам ақпараттар ағыны заманында ең алдымен азаматтық қоғамның этносаяси сауаттылығын арттыру аса маңызды. Бұл бағытта сіздердің, яғни бұқаралық ақпарат құралдары өкілдерінің де қосар үлестеріңіз орасан зор.Бүгінде 2 миллионнан астам тұрғыны бар Түркістан облысында 50-ден аса этнос өкілдері береке-бірлікте өмір сүріп келеді. Облыстық ассамблея құрамында облыстық, аудандық деңгейдегі 34 этномәдени бірлестік пен Ассамблея жанындағы құрылымдар – Қоғамдық келісім, Аналар», Медиация кеңестері, Ғылыми-сарапшылық топ және Журналистер мен блогерлер клубы ел бірлігін нығайту, ортақ мақсатқа біріктіру жолында жемісті жұмыс істеуде, – деді ол.

Түркістан облысы қоғамдық даму басқармасы «Қоғамдық келісім» КММ басшысы Эльмира Жанғазиева БАҚ өкілдерін этносаралық келісімді нығайту жолында бірлесе жұмыс істеуге шақырды.

– Қазіргі таңда этнос өкілдері үшін «Қазақтану» жобасы аясында мемлекеттік тілді меңгеруге жан-жақты қолдау жасалуда. Бұл бағытта облыстағы Ассамблея құрылымдарының ұйытқы болуымен тұрақты түрде іс-шаралар ұйымдастырылуда. Бүгінде Түркістан облысында этнос өкілдерінің 90 пайыздан астамы қазақ тілін жетік меңгерген. Сонымен бірге этнос өкілдері тығыз шоғырланған 9 ауданда Түркістан облысының қоғамдық даму басқармасы «Қоғамдық келісім» мекемесінің филиалдары белсенді жұмыс істейді. Өздеріңізге мәлім, қазіргі таңда еліміз дамудың келесі кезеңіне қадам басты. Жаңа Қазақстанды құруға бағытталған оң өзгерістер жасалуда. Халық түбегейлі өзгеріс біртіндеп, кезең-кезеңімен болатынына сенімді.

Бұл ретте, елдің бірлігін, ынтымағы мен татулығын сақтай білу – әрбіріміз үшін өте жауапты міндет. Осы орайда, БАҚ өкілдері этносаралық мәселелер туралы айтылған жерлерде жауапкершілік пен этиканы басты назарда ұстап, толеранттықты нығайтуға атсалысса, қоғамның дамуына оң ықпал ететіні сөзсіз. Ата-бабаларымыз «Бірлік бар жерде – тірлік бар» деп бекер айтпаған. Алдағы уақытта да өздеріңізбен бірлесе отырып, қоғамда өзара сыйластық, төзімділік, этносаралық келісім идеяларын нығайтуға күш саламыз деген сенімдемін. Сіздерге журналистік қызметтеріңізге шығармашылық табыс, зор денсаулық, отбасыларыңызға бақ-береке тілеймін! Мереке құтты болсын! – деді Э. Жанғазиева.

Күн тәртібінде журналистердің этносаяси сауаттылығын арттырудың өзектілігі туралы ой-пікірлер қызу талқыланып, бұл бағытта ақпараттық және медиа сауаттылықты көтеру, фактчекингтің қажеттілігі сөз болды.

Спикерлер қатарында «Turkistan Media Holding» ЖШС басқарушы директоры, республикалық «Айқын» газетінің меншікті тілшісі Тельман Бейсенов этносаралық қатынастардағы БАҚ-тың және әлеуметтік желінің рөлі туралы ой қозғап, сындарлы пікірлерін ортаға салды. Сондай-ақ семинарда «Қызмет» газетінің Бас редакторы, «Серпіліс» қоғамдық қорының төрайымы Бейсенкүл Нарымбетова этносаралық қатынастар туралы халыққа ақпарат берудің басты ерекшелігі және жауапкершілігі бойынша мазмұнды ойларымен, пайдалы тәжірибесімен бөлісті.

Семинар-тренинг барысында сөз алған бірқатар БАҚ өкілдері пікірталастарда белсенділік танытып, пікір-ұсыныстарын ортаға салды.

Іс-шара соңында семинар жұмысына қатысушыларға арнайы сертификаттар табысталды. Сондай-ақ өңірдегі этносаралық татулықты, қоғамдық келісімді нығайтуға үлес қосып жүрген бірқатар БАҚ өкілдері Түркістан облысы қоғамдық даму басқармасы басшысының орынбасары – Ассамблея хатшылығының меңгерушісі Дәурен Сариевтың атынан Алғыс хаттармен марапатталды.