Түркістанда бокстан Сидней олимпиадасының күміс жүлдегері, әлем чемпионатының күміс жүлдегері Мұхтархан Дәлдәбековтің жүлдесіне арналған халықаралық жарыс өтуде. Бокс додасына Қытай, Қырғызстан, Өзбекстан, Иемен және Қазақстанның барлық өңірінен ең таңдаулы деген боксшылар қатысуда.
Еліміздің даңқты боксшысы жерлесіміз Мұқтархан Ділдәбековтің спорттағы жарқын жетістіктері жетерлік. Спорттың төресі саналатын Сидней олимпиада ойындарында күміс жүлдегер атанған Мұқтарханның ғаламат жеңісі күні бүгінге дейін елдің есінде. Қазір аңыз болып айтылады. Биыл оныншы мәрте жалауы желбіреген бұл халықаралық доданың ашылуы салтанатында сөз сөйлеген Түркістан облысының дене шынықтыру және спорт басқармасының басшысы Қанат Жолдықараев бұл турнирдің жыл сайын қанатын кеңге жайып келе жатқанын жеткізді. Ал, бокстан олимпиада ойындарының жеңімпазы Ермахан Ибраимов бауыры Мұқтарханның тұла бойындағы дара қасиеттері мен дара боксшының ерекше қабілетін айта өтті.
Спортшы үшін бәрінен де бұрын ұлттық мүдде жоғары болуы қажет. Бұл ретте, бүгінде қазақстандық боксшылардың бағы мен бабының бәсі биік. Бүгінде бокстан Қазақстан ұлттық құрамасының бас бапкері Қайрат Сәтжан еліміздің былғары қолғап шеберлеріне олимпиада ойындарында атой салған, Мақтарал ауданының Құрметті азаматы, «Парасат» орденінің иегері Мұқтархан Ділдәбековтің жұдырықтасу өнерін әрдайым шәкірттеріне үлгі-өнеге етіп айтады.
Түркістандағы «Olympic Centr» спорт кешеніне Қытай, Өзбекстан, Йемен және Қырғызстан, Қазақстан елдерінен дарынды жас боксшылар қатысып, рингте шеберліктерін шыңдауда. Әлемдік додаға 120-ға жуық спортшы 13 салмақ бойынша жеңімпаздарды анықтауда. Еліміздің намысын жоғары деңгейде қорғап жатқан қазақстандық жас спортшыларымыздың мақсаттары айқын. Ізбасарларға жеңіс тілеген Сидней олимпиадасының күміс жүлдегері Мұқтархан Ділдәбеков Қазақстан спортының өркендеуіне мол үлесін қосуды азаматтық паразы санайтынын жеткізді.
Бокстың жазылған өз заңы бар. Осындай жоғары деңгейде ұйымдастырылған жарыстар болашаққа талантты жастардың тұсауын кеседі. Қазақстанның жұдырықты жігіттері төртжылдықтың басты додалары мен түрлі халықаралық турнирлерде ешқашан да биік белестен түскен емес.
Ат жалын тартып мінгеннен көкпарқұмар болған Мұхтархан Ділдабеков осы жылдар аралығында оңтүстік өңірде жиі ұйымдастырылатын жаппай көкпардың додасынан да алыс кеткен емес. Сондықтан болар, атақты боксшының көкпаршылығы туралы кезінде бұқаралық ақпарат құралдарында көлемді мақалалар мен сұхбаттар аз жарияланған жоқ.
Айта кетейік, Мұхтархан Қабыланбекұлы Ділдәбеков 1976 жылы 19 наурызда бұрынғы Мақтаарал ауданында дүниеге келген. Боксшы, Қазақстанның еңбек сіңірген спорт шебері (1997), аса ауыр салмақта Олимпиада ойындарының (2000) және әуесқой бокстан әлем чемпионатының (1999) күміс жүлдегері, «Парасат» орденінің иегері (2000).
1994 жылы Шымкент гуманитарлық университетіне түскеннен кейін бокспен айналыса бастады. Алғашқы жаттықтырушысы – Н.Сафиуллин. 1996 жылы Ташкент қаласында өткен С.Джексон атындағы халықаралық турнирде ауыр салмақта (91 кг-нан жоғары) жеңіс тұғырына көтеріліп, спорт шебері атанды. Үш рет Қазақстанның (1997, 1998, 1999), Бангкокте өткен ХІІІ Азия ойындарының (1998) чемпионы, Қазақстан – Куба боксшыларының жолдастық кездесуінің (1998) және Варшавада (Польша) өткен Ф.Штамм атындағы халықаралық турнирдің (1999) жеңімпазы, дүниежүзілік чемпионаттың (1999, Хьюстон, АҚШ), ХХVIII Олимпиада ойындарының (2000, Сидней, Австралия) күміс жүлдегері. ХХVIII Олимпиада ойындарына (2004, Афины, Грекия) қатысқан.
