Бүгін Түркістан облысы мәдениет басқармасының ұйымдастыруымен «Фараб» ғылыми-әмбебап кітапханасында ағылшын тілі оқытушылары арасында «Ең үздік сабақ» облыстық байқауы өтті.
Байқау Қазақстан Республикасында тіл саясатын іске асырудың 2020-2025 жылдарға арналған мемлекеттік бағдарламасын Түркістан облысында жүзеге асыру, сондай-ақ тілдердің қолданыс аясын кеңейту және жағымды имиджін қалыптастыру, оқытушылардың кәсіби-педагогикалық шығармашылығын шыңдау, оқытушылардың өзара тәжірибе алмасуы, ағылшын тілін меңгертудің озық үлгісіндегі педагогикалық тәжірибелерді тарату мақсатында ұйымдастырылған болатын.
Бұл сайысқа Түркістан облысындағы тілдерді оқыту орталығынан ересектерге ағылшын тілді оқытатын 17 оқытушы қатысып, қазақ және ағылшын тілінде екі кезең бойынша бақ сынады. Алғашқысы сөйлеу әрекетінің 4 түрі бойынша (оқылым, жазылым, тыңдалым, айтылым) дайындалған билет бойынша, екінші кезеңде тіл оқытудағы түрлі педагогикалық-психологиялық жағдаяттарға байланысты сұрақтар ұсынылды.
Қазылар алқасы шешімімен бас жүлдені Түркістан қаласының қатысушысы Ералиева Эльмира Ерубайқызы иемденсе, 1-орын Арыс қаласынан Баягизова Айнұр Лесбекқызына, 2-орын Сарыағаш ауданынан Анарқұлова Динара Сүйіндікқызына, 3-орын Отырар ауданынан Сыздықова Жазира Амангелдіқызына бұйырды. Үздік деп танылған байқау жеңімпаздары арнайы сыйлықтармен марапатталды.
