Заманауи өндірістің негізгі талаптарының бірі – энергияны тиімді пайдалану. Осыған байланысты Түркістан қаласында өндіріс орындарын дамыту барысында энергия тиімділігі қағидаттарын енгізуге ерекше көңіл бөлінуде. Жаңа өндірістік нысандарда электр энергиясын үнемдейтін жабдықтарды пайдалану, энергия тиімді жарықтандыру жүйелерін орнату, өндірістік процестерді автоматтандыру және заманауи технологияларды енгізу кәсіпорындардың тұрақты жұмыс істеуіне негіз қалайды.
Осы ретте, Түркістан қаласында өндіріс саласын дамыту және инвестиция тарту жұмыстары қарқын алып келеді. Осы бағыттағы жобалардың жүзеге асу барысы Түркістан қаласының әкімі Әзімбек Пазылбекұлының төрағалығымен өткен Индустриалды аймақ пен «TURAN» арнайы экономикалық аймағына арналған көшпелі жиында талқыланды.
Жиында Мемлекет басшысы Қасым-Жомарт Тоқаевтың өңірлердің инвестициялық тартымдылығын арттыру, өндірісті дамыту және жаңа жұмыс орындарын құру жөніндегі тапсырмаларын орындау мәселелері қаралып, инвестициялық жобалардың іске асырылу деңгейі мен инфрақұрылымдық қамтамасыз етілуі сараланды.
Қазіргі таңда «TURAN» арнайы экономикалық аймағының 290 гектар аумағында жалпы құны 120 миллиард теңгені құрайтын 14 инвестициялық жоба жүзеге асырылуда. Оның ішінде 5 жоба іске қосылып, өндіріс жұмысы жолға қойылған. Құны 61,58 миллиард теңгені құрайтын бұл жобалар нәтижесінде 771 тұрақты жұмыс орны ашылды.
Ал жалпы құны 58,43 миллиард теңгені құрайтын тағы 9 жоба іске асыру кезеңінде. Аталған кәсіпорындар толық қуатында іске қосылған кезде қосымша 1 890 жаңа жұмыс орны құрылып, жалпы тұрақты жұмыспен қамтылғандар саны 2 661 адамға жетеді.
Сондай-ақ қала басшысы өндірістік аймақтарды аралап, инфрақұрылымды жетілдіру мәселелерін көтерді. Атап айтқанда, арнайы экономикалық аймақтағы қосымша 88 гектар аумақты инженерлік инфрақұрылыммен қамтамасыз ету, электр желілерін көшіру және инвестициялық жобаларға қажетті жер телімдерін сатып алу бойынша атқарылып жатқан жұмыстар пысықталды.
Қала әкімі жауапты сала басшыларына инвестициялық жобалардың құрылыс қарқынын күшейтуді, 2026 жылға жоспарланған жобалар бойынша нақты жұмыс кестесін бекітуді және олардың тұрақты дамуын қамтамасыз етуді тапсырды.
Аралау барысында Әзімбек Пазылбекұлы Индустриалды аймақ, «TURAN» арнайы экономикалық аймағы және өндірістік парк аумағын аралап, кәсіпкерлермен жүздесті. Өндіріс өкілдерінің ұсыныстарын тыңдап, көтерілген мәселелердің шешу жолдарын талқылады.
– Түркістан бүгінде туризммен қатар өндіріс саласы қарқынды дамып келе жатқан өңірлердің біріне айналды. Сондықтан инвесторлар мен кәсіпкерлер үшін қолайлы жағдай қалыптастырып, өндірістік жобаларды белгіленген мерзімде іске асыруға басымдық беруіміз қажет. Әрбір инвестициялық жоба жаңа жұмыс орындарын ашып, қаланың экономикалық әлеуетін нығайтуға үлес қосуы тиіс. Сонымен қатар еңбек адамдары үшін қауіпсіз әрі қолайлы жұмыс ортасын қалыптастыру маңызды, – деді қала әкімі.
Энергияны тиімді пайдалану саясатының басты мақсаты – табиғи ресурстарды ұтымды пайдалану, энергия шығынын азайту және өндірістің экологиялық қауіпсіздігін қамтамасыз ету. Бұл бағыттағы жұмыстар кәсіпорындардың экономикалық тиімділігін арттырып қана қоймай, еліміздің жасыл экономикаға көшу саясатына да үлес қосады.
Өндіріс орындарында энергия үнемдеу бірнеше бағытта жүзеге асырылады. Атап айтқанда, энергия тиімді қозғалтқыштар мен өндірістік жабдықтарды пайдалану, жылу оқшаулау жүйелерін жетілдіру, электр энергиясын автоматты басқару жүйелерін енгізу, жарықдиодты шамдарды қолдану және өндірістік қалдықтарды қайта өңдеу арқылы қосымша энергия ресурстарын пайдалану мүмкіндігі қарастырылады.
Индустриалды аймақтардағы инженерлік инфрақұрылымды жаңғырту да энергия тиімділігін арттырудың маңызды бөлігі болып саналады. Сапалы электр желілері, тұрақты газбен қамту, заманауи су және кәріз жүйелері өндіріс орындарының үздіксіз жұмыс істеуіне жағдай жасап, энергия шығынын төмендетуге мүмкіндік береді.
Түркістан қаласында өндірісті дамыту барысында газдандыру жұмыстарының да маңызы зор. Табиғи газды пайдалану кәсіпорындардың энергиямен тұрақты қамтамасыз етілуіне, өндіріс тиімділігінің артуына және атмосфераға шығарылатын зиянды заттардың азаюына ықпал етеді. Бұл өз кезегінде экологиялық жағдайды жақсартып, қоршаған ортаны қорғауға бағытталған мемлекеттік саясаттың жүзеге асуына септігін тигізеді.
Сонымен қатар кәсіпорындарда жаңартылатын энергия көздерін пайдалану мүмкіндіктері де кезең-кезеңімен қарастырылуда. Күн энергиясын пайдалану, энергияны үнемдейтін технологияларды енгізу және цифрлық басқару жүйелерін қолдану өндірістің тиімділігін арттыруға бағытталған маңызды қадамдардың бірі болып табылады.
Энергияны тиімді пайдалану саясаты кәсіпкерлер үшін де экономикалық тұрғыдан тиімді. Өйткені электр және жылу энергиясына жұмсалатын шығындардың азаюы өндірістің тұрақты дамуына, инвестициялардың тиімді игерілуіне және жаңа өндіріс орындарының ашылуына мүмкіндік береді. Бұл өз кезегінде жаңа жұмыс орындарының құрылуына, халық табысының артуына және қаланың әлеуметтік-экономикалық дамуына оң әсер етеді.
Индустриалды аймақтарда жүзеге асырылып жатқан инвестициялық жобалар өңірдің өндірістік әлеуетін арттырумен қатар, экологиялық жауапкершілік қағидаттарын да басшылыққа алады. Өндіріс орындарында табиғатты қорғау талаптарын сақтау, энергия мен су ресурстарын үнемді пайдалану және өндірістік қалдықтарды тиімді басқару тұрақты дамудың маңызды бағыттарына айналып келеді.
Айта кетейік, Түркістандағы индустриялық және өндірістік аймақтарды дамыту жұмыстары өңір экономикасын әртараптандыруға, инвестиция көлемін ұлғайтуға, тұрғындарды тұрақты жұмыспен қамтуға және энергияны тиімді пайдалану мәдениетін қалыптастыруға бағытталған. Алдағы уақытта да өндірістік инфрақұрылымды жетілдіру, инновациялық әрі энергия тиімді технологияларды енгізу және инвесторлар үшін қолайлы жағдай жасау жұмыстары жүйелі түрде жалғасады. Бұл бастамалар Түркістан қаласының тұрақты экономикалық дамуына, жасыл экономика қағидаттарын іске асыруға және өңірдің инвестициялық тартымдылығын одан әрі арттыруға негіз болады.
