Түркістан қаласында газ құбыры жүргізілген – 41 780 абонент бар. Қазіргі таңда оның – 36071 абоненті көгілдір отын қолдануда.
Мемлекет басшысы Қасым-Жомарт Тоқаев Қазақстан халқына Жолдауында экологиялық мәселелерге тоқталып, түйткілдерді шешуді тапсырды. Бұл тұста облысымызда, әсіресе Түркістан қаласында ауқымды шаралар атқарылуда. Айналаны жасыл желекке бөлеумен қатар, түркістандықтарды толықтай табиғи газбен қамтамасыз ету де басты міндет болды.
Жалпы Түркістан қаласын газдандыру 11 кезеңге бөлініп, құны 20,2 млрд болатын құрылыстың жұмыстары жүргізілді. Қазіргі таңда 41 780 абонент газбен жабдықтау желілеріне қосылды. Қала үлкейіп, халық саны өскен сайын коммуналдық қажеттіліктің де артатыны белгілі. Бұл мақсатта халықты көгілдір отынмен қамтамасыз ету үшін тиісті жұмыстар әрі қарай жалғасатын болады.
Түркістанға газ тарту үшін халықаралық маңызы бар Бейнеу-Бозой магистарльды газ құбыры тартылып, автоматтандырылған газ тарату станциялары іске қосылған еді. Нәтижесінде 1180 км газ құбыры тартылды. 4 800 адам жұмыспен қамтылды. Түркістан қаласында газ тарату жүйелері жүргізіліп, жеке тұрғын үйлерге газ кіргізу жұмыстары жалғасуда.
Жалпы, Түркістанда демалыс орындары көбейіп, көгалдандыру жұмыстары қарқынды жүргізіліп жатыр. Қаланың экологиялық жағдайын жақсарту мақсатында ең озық технологиялар қолданылуда. Қаланың толық табиғи газға қосылуы – қоршаған ортаны қорғаудың ең тиімді жолы еді.
Айта кетейік, шаһар бойынша газбен қамту көрсеткішін жыл соңына дейін 95%-ға көтеру жоспарланған.
