Түркістан қаласындағы «Достық үйінде» Қазақстан халқы Ассамблеясының 30 жылдығы аясында «Мәдениет және ұлттық салт-дәстүр» атты іс-шара өтті.
Жиынға облыстық ҚХА құрылымдары мен этномәдени бірлестіктердің өкілдері, ғалымдар және қоғам белсенділері қатысты.
Іс-шара барысында Түркістан облыстық қоғамдық даму басқармасы басшысының орынбасары Нұрсұлтан Сейтжанов этностар арасындағы достық пен мәдени ынтымақтастықтың маңыздылығына тоқталды.
Келелі жиында тарих ғылымдарының кандидаты Ақмарал Сандыбаева, ҚХА жанындағы Ғылыми сарапшылық топтың жетекшісі Сейдулла Садықов, «Әзірет Сұлтан» ұлттық тарихи-мәдени музей-қорығының ғылыми қызметкері Гүлмира Атабаева ұлттық мәдениет пен дәстүрдің бүгінгі қоғамдағы рөлі жайлы баяндады.
Жиында этномәдени бірлестіктің өкілдері мен өнерпаздар патриоттық әндер шырқады. Бұл ретте, Мұратжан Атажанов домбырамен «Қоғалы-ай» әнін, Жанар Абажанова жетіген аспабында халық әні «Бүлдіргенді» орындап, жиналған қауымды ұлттық өнердің құдіретімен сусындатты. Сондай-ақ Түркістан облыстық Қазақстан халқы Ассамблеясы жанындағы Аналар кеңесі «Сәулем-ай» әнін орындап, іс-шараның көркін аша түсті.
