Халықаралық Олимпиада комитеті 1948 жылы Санкт-Морицеде өткен Халықаралық Олимпиада комитетінің 42-сессиясында 23 маусымда «Халықаралық Олимпиада күнін» өткізу туралы шешім қабылдады. Сол жылдан бастап дәл осы күні әлем бойынша Олимпиада күні тойланады.
Биыл Қазақстанда Олимпиада күніне орай мерекелік іс-шара киелі Түркістан қаласында бастауын алды. Жаңадан іргетасы қаланған «Олимпиада орталығы» кешенінде өткен іс-шарада танымал спортшылар құрметті қонақ болды. Оның ішінде, әлем чемпионатының және Сиднейде 2000 жылы өткен жазғы Олимпада Ойындарының күміс жүлдегері, боксшы Мұхтархан Ділдәбеков, Қазақстанға еңбек сіңірген жаттықтырушы Ғалымбек Кенжебаев, Атланта және Сидней Олимпиадаларның күміс жүлдегері, әлем чемпионы, екі дүркін Азия чемпионы Болат Жұмаділов бар.
Даңқты спортшылар Түркістан облысының жас спортшыларының өнерін тамашалады. Көркем гимнастика шеберлері, таеквондошылар көрсетілімін жасаса, Болат Жұмаділов жас боксшыларға шеберлігін көрсетті. Олимпиаданың екі дүркін жүлдегері Болат Жұмаділов бүгінгі шараға қатысқан балалардың спорттағы беталысын жоғары бағалады.
«Спортшы үшін Олимпиада күнінің маңызы зор. Спорттың өмірдегі маңызы зор. Тек ел ішінде емес, әлемде спорт бейбітшіліктің елшісі. Сондықтан әр адам спортпен шұғылданып, өз денсаулығын күтуі қажет.
Бүгін іс-шараға көп спортшылар келді. Жас буын соларға қарап бой түзейді. Мемлекетіміз жас спортшыларымызға осылай көңіл бөліп, олардың дамуына көп үлес қосып жатыр», – деді даңқты боксшы.
Ары қарай, мерекелік спорттық іс-шараның құрметті қонақтары спорт кешені аумағында орналасқан үстел теннисі, таеквондо WT, күрес залында өткізілетін шеберлік сабақтарына қатысып және жас спортшыларымен сұхбаттасты.
Спорт департаментінің директоры Елсияр Қанағатов түркістандық жас спортшыларға арнайы сыйлықтарды табыстап, облыстағы спорттың дамуына атсалысып жүрген азаматтарды арнайы алғыс хатпен марапаттады.
«Бүгін Ұлттық Олимпиада комитетінің ұйымдастыруымен Олимпиада күні аталып өтті. Біздің даңқты спортшыларымыз да іс-шараға қатысты. Оларды жас спортшылармен жүздестіріп, шеберлік-сағаттарын өткіздік.
Олимпиаданың бес шеңберіне сәйкес еліміздің бес өңірінде маңызды іс-шаралар өткіземіз. Киелі Түркістан жерінде бастадық. Артынша жаңадан құрылған Абай облысының орталығы Семей, сосын Ұлытау облысының орталығы Жезқазған және Алматы облысының орталығы Қонаев қалаларында аталып өтеді. Қорытынды іс-шара Нұр-Сұлтанда өтеді деп жоспарланған.
Ел Президенті Қасым-Жомарт Тоқаевтың бұқаралық спортты дамыту бастамасы бойынша және биыл «Балалар жылы» аталуына байланысты жас спортшыларымызға аса көңіл бөлініп жатыр», – дейді Елсияр Қанағатов.
Еске салсақ, 15 маусым күні Түркістанда бокстан Сидней олимпиадасының күміс жүлдегері, әлем чемпионатының күміс жүлдегері Мұхтархан Дәлдәбековтің жүлдесіне арналған халықаралық жарыс басталған болатын. Түркістандағы «Olympic Centr» спорт кешеніне Қытай, Өзбекстан, Иемен және Қырғызстан, Қазақстан елдерінен дарынды жас боксшылар қатысып, рингте шеберліктерін шыңдауда. Әлемдік додаға 120-ға жуық спортшы 13 салмақ бойынша жеңімпаздарды анықтауда. Еліміздің намысын жоғары деңгейде қорғап жатқан қазақстандық жас спортшыларымыздың мақсаттары айқын. Ізбасарларға жеңіс тілеген Сидней олимпиадасының күміс жүлдегері Мұқтархан Ділдәбеков Қазақстан спортының өркендеуіне мол үлесін қосуды азаматтық паразы санайтынын жеткізді.
Бокстың жазылған өз заңы бар. Осындай жоғары деңгейде ұйымдастырылған жарыстар болашаққа талантты жастардың тұсауын кеседі. Қазақстанның жұдырықты жігіттері төртжылдықтың басты додалары мен түрлі халықаралық турнирлерде ешқашан да биік белестен түскен емес.
