Түркістан қаласының әкімі Әзімбек Пазылбекұлы «TURAN» арнайы экономикалық және индустриялық аймақтарын аралап, өндірістік жобалардың іске асу барысын, құрылыс жұмыстарының қарқынын және аумақтарды қажетті инженерлік инфрақұрылыммен қамтамасыз ету мәселелерін саралады. Жұмыс барысында инвестициялық жобаларды тарту және энергия ресурстарын тиімді пайдалану, экономикалық аймақтарды кеңейту арқылы жаңа өндіріс орындарын ашу бағыттарына ерекше мән берілді.
Кездесуде арнайы экономикалық аймақты 88 гектарға кеңейту жұмыстарының барысы қаралды. Жаңа аумақта өндірістік нысандарды орналастыру үшін қажетті инженерлік желілер кезең-кезеңімен тартылуда. Атап айтқанда, 12,6 шақырым электр желісі, 6,2 шақырым газ құбыры, 3,2 шақырым ішкі су құбыры, 2,6 шақырым кәріз және 2,6 шақырым байланыс желісі салынады. Сонымен қатар магистральдық су құбырын жүргізу және бетон жол салу жоспарланған.
Бұл жұмыстардың барлығы өндірістік аймақтардың тұрақты жұмыс істеуіне мүмкіндік беріп қана қоймай, Түркістанның экономикалық әлеуетін арттыруға бағытталған. Әсіресе энергетикалық инфрақұрылымды алдын ала жоспарлау жаңа кәсіпорындардың үздіксіз жұмысын қамтамасыз ету үшін маңызды.
Түркістан қаласында энергияны тиімді пайдалану саясаты индустриялық дамумен қатар жүргізілуі тиіс. Өйткені жаңа өндіріс орындарының көбеюі электр энергиясына деген сұранысты арттырады. Осыған байланысты энергия үнемдейтін технологияларды енгізу, электр желілерінің өткізу қабілетін арттыру, энергия шығынын азайту және заманауи басқару жүйелерін пайдалану өзекті міндет болып отыр.
Өндірістік нысандарды орналастыру кезінде энергия тиімділігі жоғары жабдықтарды қолдануға басымдық беру, жарықтандыру жүйелерін автоматтандыру, жылу және электр энергиясын есепке алудың цифрлық құралдарын енгізу маңызды. Сонымен бірге кәсіпорындардың энергия тұтынуын тұрақты бақылау арқылы артық шығындардың алдын алуға болады.
Энергия тиімділігі тек коммуналдық шығындарды азайтудың құралы емес, сонымен қатар қаланың ұзақ мерзімді экономикалық тұрақтылығын қамтамасыз ететін маңызды фактор. Инженерлік инфрақұрылымның сапалы құрылуы, өндіріс орындарының энергиямен сенімді қамтылуы және ресурстарды ұтымды пайдалану Түркістанның инвестициялық тартымдылығын одан әрі арттырады.
Алдағы уақытта «TURAN» арнайы экономикалық және индустриялық аймақтарында жаңа жобалардың іске қосылуы жаңа жұмыс орындарын ашуға, жергілікті өндірісті дамытуға және қала экономикасын әртараптандыруға серпін береді. Бұл ретте энергияны тиімді пайдалану қағидаттарын өндірістік саясатпен ұштастыру Түркістанның заманауи әрі орнықты экономикалық орталық ретінде қалыптасуына негіз болмақ.
Сонымен қатар, ламинат өндіруге бағытталған құны 5 млрд теңге болатын «Qaz Natural Laminat» ЖШС-нің өндірістік нысанында болды. Бірінші кезеңі іске қосылған кәсіпорын қазір өндірісті кеңейтуге бағытталған екінші кезеңге дайындалуда.
