Түркістан облысы – Қазақстанның рухани астанасы ғана емес, сондай-ақ қарқынды дамып келе жатқан өңірлердің бірі. Соңғы жылдары өңірде әлеуметтік-экономикалық салаларда оң өзгерістер байқалуда. Бұл даму үрдісінің басты қозғаушы күштерінің бірі – жол инфрақұрылымының жақсаруы. Сапалы жолдар – экономикалық өсудің негізі. Түркістан облысында жол құрылысы мен жөндеу жұмыстарының ауқымы кеңейіп, 2025 жылға қарай жалпы жолдардың 87%-ы қанағаттанарлық жағдайда болды. Бұл көрсеткіштің артуы өңірдегі ауыл шаруашылығы өнімдерін ішкі және сыртқы нарықтарға дер кезінде жеткізуге жол ашты. Жүк тасымалының артуы, көлік шығындарының азаюы – кәсіпкерлер үшін тиімді бизнес жүргізуге жағдай жасап отыр.
Сонымен қатар, жол сапасының артуы туризм саласына да тікелей әсер етті. Түркістан қаласына апаратын негізгі көлік жолдарының жаңартылуы туристер ағынын көбейтіп, шағын және орта бизнестің дамуына серпін берді. Жаңа қонақ үйлер, дәмханалар мен қызмет көрсету орындары ашылып, жергілікті тұрғындар үшін жұмыс орындары пайда болды. Жол инфрақұрылымының жақсаруы тек экономикалық емес, әлеуметтік салаларға да оң ықпал етуде. Ауыл мен қала арасындағы байланыс нығайып, тұрғындардың білім, денсаулық сақтау, мәдени қызметтерге қолжетімділігі артты. Бұл өз кезегінде халықтың өмір сүру сапасын жақсартуға мүмкіндік беріп отыр. Қорыта айтқанда, Түркістан облысының әлеуметтік-экономикалық дамуы жол сапасына тікелей тәуелді. Инфрақұрылымның тұрақты дамуы – өңірдің болашағының берік іргетасы.
Түркістан облысы бойынша автомобиль жолдарының жалпы ұзындығы 17 692 шақырымды құрайды. Оның ішінде республикалық маңызы бар жолдар 678 шақырым болса, облыстық, аудандық маңызы бар жолдар – 3983 шақырым. Елді мекен көшелері 11305 шақырымды құрайды. 2025 жылы облыс аумағындағы автомобиль жолдары саласын дамытуға бюджеттен қаржы бөлініп, құрылыс-жөндеу жұмыстарымен жалпы 283 нысан немесе 1181,2 шақырым жол мен көшелер қамтылуда. Жыл қорытындысымен 222 нысан немесе 929,3 шақырым жол пайдалануға беріледі деп көзделуда.
Аталған саладағы мәселелер Түркістан облысының әкімі Нұралхан Көшеровтің төрағалығымен өткен аппараттың апталық мәжілісінде талқыланды. Өңір басшысы жауаптыларға жұмысты ширатуды тапсырды.
– Жолдың сапасына мән беріледі. Бұл бойынша тиісті мекемелер тарапынан кемшіліктер анықталса, жауапты басшылар, аудан, қала әкімдері тәртіптік жауапкершілікке тартылатынын ескертемін. Жұмысты жандандырыңыздар және әр жоба қатаң бақылауға алынсын, – деді Нұралхан Көшеров.
Мәжілісте Түркістан облысы жолаушылар көлігі және автомобиль жолдары басқармасының басшысы Қуатжан Жұматаев пен «ҚазАвтоЖол» ҰҚ» АҚ-ның Түркістан облыстық филиалы басшысының міндетін атқарушы Мұрат Мықтыбаевтың есептері тыңдалды.
Биыл облыстық маңызы бар жолдарға 19,6 млрд. теңге бөлініп, 24 нысан немесе 225,5 шақырым жол құрылыс-жөндеу жұмыстарымен қамтылуда. Жыл қорытындысымен 17 нысан (7 көпір) немесе 111,8 шақырым жол пайдалануға беріледі. Аудандық маңызы бар жолдарға 3,1 млрд. теңге бөлініп, 24 нысан немесе 130,7 шақырым жол күрделі және орташа жөндеу жұмыстарымен қамтылуда. Биыл 12 нысан немесе 49,3 шақырымы пайдалануға беріледі. Елді мекен көшелеріне келсек, 235 нысан немесе 831,2 шақырым жол жөнделіп жатыр. Жыл соңына дейін 193 нысан немесе 774,4 шақырым жол пайдалануға беріледі деп жоспарланған. «Ауыл – Ел бесігі» жобасы бойынша 140 елді мекенде 90 нысан (347 көше) немесе 391,8 шақырым көше жөндеу жұмысымен қамтылуда. Жыл соңына дейін 87 нысанды пайдалануға беру көзделген. 2025 жылдың қорытындысымен жергілікті маңызы бар жолдардың жақсы және қанағатты жағдайдағы үлесін 93,7%-дан 95%-ға жеткізу жоспарланған.
Мәжілісте осы саладағы жұмысқа кері әсерін тигізіп жатқан факторлар зерделеніп, жауаптыларға мемлекеттік сатып алу жұмысын жеделдету, битум шығаратын зауыттардың жұмыс қарқынын түсірмеу, мердігерлердің жұмысын бақылап, жол сапасын жақсарту, айналма жолдардың құрылысын үйлестіру жөнінде тиісті міндеттер жүктелді.
Айта кетейік, Қазақстанның жол саласы соңғы жылдары ауқымды жаңғырту мен даму кезеңін бастан өткеруде. Бұл сала экономиканың маңызды бөлігі ретінде елдің көлік инфрақұрылымын жақсартуға бағытталған кешенді шараларды қамтиды.2025 жылы елімізде жалпы ұзындығы 4,7 мың шақырымды құрайтын жаңа жол жобалары іске асырылуда. Қазақстанның жол саласы қазіргі уақытта ауқымды жаңғырту мен даму кезеңін бастан өткеруде. Ірі жобалардың іске асырылуы, инновациялық технологиялардың енгізілуі және кадр мәселесіне көңіл бөлінуі еліміздің көлік инфрақұрылымының сапасын арттыруға бағытталған маңызды қадамдар болып табылады. Жол құрылысында инновациялық технологиялар мен отандық өнімдер қолданылуда. 2023 жылы республикалық маңызды жолдардағы тәжірибелік учаскелерде 80-нен астам бастама сынақтан өтіп, ең тиімділері іріктелді. Бұл шаралар асфальт қабатының беріктігін арттырып, құрылыс уақытын қысқартуға мүмкіндік береді .
