Түркістан облысы Қазығұрт асуында орналасқан «Нұх пайғамбар кемесі» мемориалдық кешенінің жаңғыртудан өтіп, пайдалануға берілуі – өңірдің әлеуметтік-экономикалық дамуындағы маңызды оқиғалардың бірі. Бұл жоба тек тарихи-рухани мұраны жаңғырту емес, сонымен қатар аймақтың туристік әлеуетін арттыруға, инфрақұрылымды дамытуға және жергілікті халықтың әл-ауқатын жақсартуға бағытталған кешенді қадам ретінде бағаланады. Ашылу рәсіміне Түркістан облысының әкімі Нұралхан Көшеров қатысып, көпшілікті құттықтады. Аталған құрылыс жұмыстары әлеуметтік инфрақұрылымды дамытуға, туристік әлеуетті арттыруға және елді мекеннің сәулеттік келбетін жақсартуға бағытталған.
– Ата-бабаларымыз «Қазығұрттың басында кеме қалған, ол әулие болмаса неге қалған?» деп бекер айтпаған. 2004 жылы бой көтерген «Нұх пайғамбар кемесі» мемориалдық кешені – ұлттың рухын көтеретін, тарих пен дәстүрді дәріптейтін ерекше нысан. Бүгін осы мемориалдық кешеннің қайта жаңғыртудан өтіп, жаңа кейіпке енуіне куә болып тұрмыз. Аталған ескерткіш – ұлттың бірлігі мен берекесінің, ізгіліктің символы. Мемлекет басшысы Қасым-Жомарт Кемелұлы Тоқаев мәдени мұра мен рухани туризмді дамытуды ел дамуының маңызды бағыты ретінде айқындады. Осы бағытта Түркістан облысында тарихи-мәдени нысандарды сақтап, өңірдің туристік әлеуетін арттыру бойынша жұмыстар атқарылуда. Қазығұрт – тарихы терең өңір. Осы аймақта туризмді дамыту – ортақ міндетіміз. Бүгінгі жаңғыртудан өтіп, қайта ашылып отырған «Нұх пайғамбар кемесі» мемориалдық кешені ел рухын асқақтататын ескерткіш болады деп сенемін. Халқымыздың мәртебесі Қазығұрт тауындай биік, әрбір бастамамыз жемісті болсын! – деді Түркістан облысының әкімі Нұралхан Көшеров.
Қазығұрт асуында орналасқан «Нұх пайғамбар кемесі» мемориалдық кешені жаңғыртылып, абаттандыру жұмыстары толық жүргізілген. Жобаны «Қарағанды Көркем» ЖШС жүзеге асырды. Абаттандыру жұмыстары 2024 жылдың шілде айында басталып, 2025 жылдың қазан айында аяқталды. Мемориалдық кешеннің жалпы аумағы – 5 гектар.
Кешен аумағында биіктігі 51 метр болатын мемлекеттік Ту орнатылған. Сонымен қатар 1880 шаршы метр аумаққа газон төселіп, 29 жарықтандыру шамы қойылды. Айналаны көгалдандыру мақсатында 400 түп шырша көшеті егілді. Нысан құрамына кеме пішіндес, биіктігі 11 метр болатын монумент, нақыл сөздер жазылған 3 монумент, 2 демалыс орны, 2 сауда орны, сондай-ақ әжетхана енгізілген.
Қазығұрт тауы түркі әлемі үшін ерекше символдық мәнге ие. Аңыз бен тарихи сананың тоғысқан тұсы ретінде бұл мекен ғасырлар бойы халықтың рухани жадында сақталып келеді. Мемориалдық кешеннің заманауи талаптарға сай қайта жаңғыртылуы ұлттық құндылықтарды дәріптеумен қатар, оларды экономикалық айналымға енгізудің тиімді үлгісін көрсетеді. Яғни руханият пен экономиканы ұштастыра отырып, өңірлік дамудың жаңа нүктесі қалыптасуда.
Әлеуметтік-экономикалық тұрғыдан алғанда, кешеннің іске қосылуы ең алдымен туризм саласына серпін береді. Ішкі және сыртқы туристер легінің артуы қонақүй бизнесінің, қоғамдық тамақтану орындарының, қызмет көрсету саласының дамуына жол ашады. Бұл өз кезегінде жаңа жұмыс орындарының ашылуына, шағын және орта бизнестің белсенділігін арттыруға ықпал етеді. Ауылдық және таулы аймақтар үшін мұндай жобалардың маңызы ерекше, себебі олар халықты тұрақты жұмыспен қамтып, көші-қон үдерістерін тежеуге мүмкіндік береді.
Инфрақұрылымдық даму да мемориалдық кешенмен тығыз байланысты. Жолдардың жөнделуі, инженерлік желілердің тартылуы, байланыс және қауіпсіздік жүйелерінің жетілдірілуі тек туристік нысанға ғана емес, сол маңдағы елді мекендердің өмір сапасына оң әсер етеді. Мемлекеттік және жеке инвестициялардың тартылуы өңір экономикасының әртараптануына, бюджет кірістерінің ұлғаюына жағдай жасайды.
Сонымен қатар, кешен білім беру және мәдени-ағартушылық бағытта да маңызды рөл атқарады. Мұнда өткізілетін экскурсиялар, ғылыми-танымдық шаралар, мәдени іс-шаралар жастардың тарихи санасын қалыптастырып, отансүйгіштік рухын күшейтеді. Бұл – адами капиталды дамытуға бағытталған ұзақ мерзімді инвестиция.
Қазығұрт асуындағы «Нұх пайғамбар кемесі» мемориалдық кешенінің жаңғыртылып, пайдалануға берілуі Түркістан облысының әлеуметтік-экономикалық даму стратегиясымен толық үндеседі. Ол өңірдің туристік тартымдылығын арттырып қана қоймай, экономикалық өсімге, әлеуметтік тұрақтылыққа және рухани жаңғыруға қызмет ететін көпқырлы жоба ретінде өңір дамуының жаңа кезеңін айқындайды.
Президент өз Жолдауларында және түрлі жиындарда тарихи-мәдени мұраны сақтау, оны заманауи талаптарға сай жаңғырту арқылы өңірлердің экономикалық әлеуетін арттыру қажеттігін үнемі атап келеді.
Қасым-Жомарт Тоқаев «Туризм – экономиканың өсу нүктелерінің бірі болуы тиіс» деп, елдегі киелі орындар мен тарихи нысандарды кешенді түрде дамытуға басымдық беруді тапсырған болатын. Осы тұрғыдан алғанда, Қазығұрттағы мемориалдық кешеннің қайта жаңғыртылуы – Президент тапсырмаларының нақты іске асуының көрінісі. Қазығұрт тауы – қазақ халқының рухани дүниесінде айрықша орны бар киелі мекен. Бұл жерді абаттандыру мен заманауи инфрақұрылыммен қамтамасыз ету ұлттық құндылықтарды сақтаумен қатар, оларды ел игілігіне айналдыруға мүмкіндік береді.
Мемлекет басшысы «Өңірлердің дамуы – ел дамуының негізі» екенін атап өтіп, әр аймақ өзінің ішкі әлеуетін толық пайдалануы қажет екенін айтқан. «Нұх пайғамбар кемесі» мемориалдық кешені осы әлеуетті іске қосудың жарқын мысалы. Кешеннің ашылуы өңірге туристер тартуға, шағын және орта бизнесті дамытуға, жаңа жұмыс орындарын ашуға жол ашады. Бұл – Президент көтерген халықтың әл-ауқатын арттыру, табыс көздерін көбейту, ауылдық аймақтарды дамыту міндеттерімен толық сәйкес келеді.
Сонымен қатар, Қасым-Жомарт Тоқаев ұлттық бірегейлікті нығайту, тарихи сананы жаңғырту мәселесіне ерекше мән береді. Мемориалдық кешен тек туристік нысан ғана емес, өскелең ұрпаққа тағылым беретін рухани-танымдық орталыққа айналмақ. Мұнда өткізілетін мәдени және ағартушылық шаралар жастарды ел тарихын құрметтеуге, ұлттық құндылықтарды қадірлеуге тәрбиелейді. Бұл Президент айтқан «рухани жаңғыру нақты істерден басталуы керек» деген ұстанымның өмірдегі көрінісі.
Қазығұрт асуындағы «Нұх пайғамбар кемесі» мемориалдық кешенінің жаңғыртылып, пайдалануға берілуі – Қасым-Жомарт Тоқаевтың өңірлерді дамыту, туризмді өркендету және ұлттық мұраны сақтау жөніндегі саясатының нәтижелі жүзеге асып жатқанын көрсетеді. Бұл жоба Түркістан облысының ғана емес, тұтас елдің әлеуметтік-экономикалық және рухани дамуына серпін беретін маңызды бастама болып табылады.
