Түркістан қаласында әлеуметтік маңызы бар азық-түлік тауарларының кезекті жәрмеңкесі өтті. Сауда-саттық «Отырар» тұрғын алабындағы «Достық үйінің» автотұрағында ұйымдастырылып, тұрғындарға қолжетімді бағамен қажетті өнімдер ұсынылды. Мұндай жәрмеңкелер аптаның әр жұма күні тұрақты түрде өткізіліп келеді. Сөрелерге қойылған тауарлар нарықтағы бағадан 30-50 пайызға дейін арзандатылған бағамен сатылды.

Жәрмеңкеге Арыс қаласы, Созақ , Ордабасы, Сайрам аудандарының шаруалары, «Түркістан» әлеуметтік-кәсіпкерлік корпорациясы» АҚ және жергілікті кәсіпкерлер қатысып, ет-сүт өнімдері, көкөніс пен бақша дақылдарын тиімді бағамен ұсынды. Қала тұрғындарына жалпы 30 тоннаға жуық ауыл шаруашылығы өнімдері сатылды. Картоптың келісі – 140 теңге, пияз – 90 теңге, сәбіз – 140 теңге, қырыққабат – 100 теңгеден, сиыр етінің келісі – 2500 теңгеден, тауық еті – 1100 теңгеден саудаланды. Сондай-ақ, нан 80 теңгеден, жұмыртқаның данасы 45 теңгеден тұрғындарға ұсынылды.