Мемлекет басшысы Қасым-Жомарт Тоқаев Мемлекеттік рәміздер күнімен құттықтады.
«Баршаңызды Мемлекеттік рәміздер күнімен шын жүректен құттықтаймын!
Мемлекеттік рәміздер – егемендік пен елдіктің ең басты белгісі. Көк байрағымыз, Елтаңбамыз және Әнұранымыз – күллі халқымызға қастерлі нышандар. Біз үшін Тәуелсіздік – ең қымбат құндылық, ал туымыздың асқақ желбірегені – аса биік мәртебе. Батыр бабаларымыз сын сағатта әрдайым бір тудың астында жиналған. Бөрілі байрақ күллі түркі жұртын біріктірген. Абылай ханның ақ туы бүкіл қазақтың басын қосқан. Алаш туы арыстарымыздың жігерін жанып, намысын қайраған. Біз бабаларымыздың даңқты жолын жалғастырып келеміз. Байрағымыз Біріккен Ұлттар Ұйымының төрінде тұр. Оны ғарышкерлеріміз көк жүзіне көтерді. Альпинистеріміз әлемнің ең биік шыңдарына орнатты. Спортшылар жеңіс тұғырынан желбіретіп, әнұранымызды шырқатты. Күллі әлем қазақ елін көк байрағына қарап танитын болды»
Түркістан қаласындағы «Рәміздер алаңында» 4 маусым – ҚР Мемлекеттік рәміздер күніне арналған қорытынды іс-шара өтті. Жүздеген адам жиналып, отаншылдықты дәріптеп, рәміздерді насихаттауға үлес қосты. Таңертең жүгіру марафонынан басталған мереке концерттік әрі рухани бағдарламаға ұласты. Салтанатты жиында Қазақстан Республикасының Мемлекеттік Әнұраны орындалып, Мемлекеттік Туы көтерілді.
Түркістан облысының әкімі Дархан Сатыбалды жұртшылықты мерекемен құттықтады.
– Сіздерді 4 маусым – Мемлекеттік рəміздер күнімен шын жүректен құттықтаймын! 1992 жылы, 4 маусымда еліміздің мемлекеттік рәміздері бекітілді. Халықаралық деңгейде мойындалды. Спортшыларымыз жеңіске жеткен сәттерді де Мемлекеттік ту желбіреп, Әнұранымыз шырқалды.
Мемлекеттік Ту, Елтаңба, Әнұран – Тәуелсіздігіміздің белгісі және ажырамас бөлігі. Еліміздің егемендігі мен біртұтастығын бүкіл әлемге танытатын құндылықтар. Тәуелсіздікті сақтау, қадір-қасиетіне жету Мемлекеттік рәміздерімізді құрметтеуден басталады. Түркістан өңірінде де рәміздерін айрықша қадірлейтін отаншыл жастар өсіп келеді. Әр азамат ұлттық құндылықтарға адал болып, мемлекеттің дамуына үлес қосуы тиіс. Көк туымыз бейбітшілік аспанында мәңгі желбіресін! Еліміз аман, мемлекетіміз қуатты болсын! – деді Дархан Сатыбалды.
Салтанатты жиында осы мерекеге арнайы өткізілген жүгіру марафонының жеңімпаздары марапатталды. Сонымен бірге мемлекеттік қызметшілер Отанға адал қызмет етуге ант берді. Облысқа және республикаға танымал әншілер отаншылдыққа шақыратын әндер шырқады. Мерекелік жиын Ескендір Хасанғалиевтің «Атамекен»
әнімен қорытындыланды. Қолдарына Көк Туды желбіреткен Түркістан жұртшылығы айтулы мерекені жоғары деңгейде атап өтті.
Осы күні Түркістан қаласында және аудан, қалаларда велошерулер, автошерулер, мерекелік іс-шаралар ұйымдастырылды. Көк туды желбіреткен Түркістан жұртшылығы, Әнұранды тебірене шырқады.
Сонымен қатар, Мемлекеттік рәміздер күніне арналған «Менің туым – менің Отаным!» атты бұқаралық жүгіру марафоны өтті. Облыстық дене шынықтыру және спорт басқармасы, «AMANAT» партиясы Түркістан облыстық филиалы және Түркістан қаласының әкімдігі ұйымдастырған марафонға 500-ге жуық тұрғын қатысты. Сонымен қатар еліміздің Атырау, Ақтау секілді қалаларынан келген қонақтар да өз бақтарын сынады.
Президент Қасым – Жомарт Тоқаевтың тапсырмасына сәйкес бұқаралық спортты дамыту және халықты спортпен шұғылдануға көптеп шақыру, салауатты өмір салтын қалыптастыруға бағытында ұйымдастырылған шара Б.Саттарханов даңғылы бойында орналасқан тікұшақ алаңынан Рәміздер алаңына дейін жалғасты. Азаматтар марафон аясында 2,4 шақырымды жүгіріп өтіп, үш жас ерекшелігі бойынша үздіктер анықталды.
10-13 жас аралығында Рустам Суннатиллаев мәре сызығын бірінші кессе, екінші болып Диярбек Хусанов келді. Ал Азамат Анафия үшінші орынды иеленді. Сонымен қатар 23-27 жас аралығында бірінші орынды Бақкелді Саулебайұлы иеленсе, Шақижахан Юлдашев екінші орынға шықты. Үшінші орын Нұрбақыт Қамбарбекке бұйырды. Сондай-ақ 38 жастан асқан марафоншылар арасында Серік Исмаил бірінші орыннан көрінсе, Марат Нұрмахан мәре сызығына екінші болып жетті. Ал Алмас Рустем үшінші орынды олжалады. Спорттық шарада ең жас марафоншы 7 жастағы Алан Абибулла мен белсенді қатысқан азаматтар да марапат иегері атанды.
Арнайы өткізілген жүгіру марафонының жеңімпаздарын «AMANAT» партиясы Түркістан облыстық филиалының төрағасы Алтынсары Үмбетәлиев, облыстық дене шынықтыру және спорт басқармасының басшысы Қанат Жолдықараев, Түркістан қаласы әкімінің орынбасары Ерлан Күзембаев салтанатты түрде марапаттады.
«AMANAT» партиясы Түркістан облыстық филиалының төрағасы Алтынсары Үмбетәлиев, қасіретті жылдарда, аумалы-төкпелі замандарда ел егемендігі, жер тұтастығы үшін басын бәйгеге тіккен ұлтымыздың небір асыл азаматтары осы күнді көрмей кетті. Сондықтан, бұл күнді құрметтеу, тәуелсіз ел екенімізді айқындап тұрған рәміздерімізді қадірлеу – әр отандасымыздың қастерлі парызы екендігін атап өтті.
Марафон соңы ҚР Мемлекеттік рәміздер күніне арналған қорытынды іс-шараға ұласты. Салтанатты жиында Қазақстан Республикасының Мемлекеттік Әнұраны орындалып, Мемлекеттік Туы көтерілді. Түркістан облысының әкімі Дархан Сатыбалды жұртшылықты мерекемен құттықтады.
Бұл күні Түркістан қаласында және аудан, қалаларда велошерулер, автошерулер, мерекелік іс-шаралар ұйымдастырылды. Көк туды желбіреткен Түркістан жұртшылығы, Әнұранды тебірене шырқады. Қолдарына Көк Туды желбіреткен Түркістан жұртшылығы айтулы мерекені жоғары деңгейде атап өтті.
