Бүгін Түркістан облыстық мәдениет басқармасы, Облыстық мәдениет және халық шығармашылығы орталығының ұйымдастыруымен «Бал таңдай» облыстық балалар өнер фестивалі аясындағы «Менің туған жерім» жас суретшілер байқауы өтті. «Ұлы дала елі орталығы» алаңында 19 үміткер бақ сынады.
Байқаудың алғашқы іріктеу кезеңіне облыстағы барлық аудан-қаладан 8-16 жас аралығындағы 32 қатысушы (онлайн форматта) өтінім білдіріп, ұйымдастыру алқасының шешімімен 19 үміткер өнер сайысының ақтық кезеңіне жолдама алған болатын. Үміткерлерге туындыны салуға 3 сағат уақыт берілді. Байқауға ҚР Президентінің «Ерен еңбегі үшін» медалі иегері, Халықаралық «Тұран-Қазақ» суретшілер консолидациясының мүшесі Мәлік Әділхан, Халықаралық дәрежедегі жас суретші-кескіндемеші, дизайнер-иллюстратор Абдураимова Санобар, ҚР Суретшілер және дизайнерлер одағының мүшесі Байдәулетов Жантөре төрелік етті.
Қазылар алқасының шешімімен Бас жүлде Сайрам ауданының қатысушысы Дүйсенбек Сымбатқа бұйырды. Ал І орынды Әділхан Дана (Отырар ауданы) иемденсе, Бақберген Айдана (Төлеби ауданы) мен Жұмабек Таңат (Түлкібас ауданы) ІІ орын иегері атанды. ІІІ орынды Керімше Әділхан (Түркістан қаласы), Жолдасбек Айтжан (Келес ауданы) мен Жұмабек Адина (Түлкібас ауданы) өзара бөлісті. Ал Тасполат Бекхан (Төлеби ауданы) мен Халибекова Ақмаржан (Сауран ауданы) «байқау дипломанты» атанды. Аталмыш байқауға қатысқан барлық қатысушы үміткер қатысқаны үшін «Алғыс хаттарға» ие болды.
Облыстық мәдениет және халық шығармашылығы орталығының директоры Мейіржан Алиакбаров: «Жас қылқалам шеберлерінің шығармашылығын дәріптеу, оларға қолдау білдіру, суретшілік өнердің кәсіби деңгейге көтерілуіне жол ашу, дарынды жас суретшілердің тың туындыларын насихаттау мақсатындағы байқау облыс аймағындағы талантты суретшілерді анықтауға ықпал етеді» – деді. Сондай-ақ сайыста топ жарған жеңімпаздарды құттықтап, арнайы сый-сияпат табыстады.
